Шинжлэх ухаан технологи хөгжиж, мэдээлэл харилцаа хүний ой тойнд багтахааргүй хурдтайгаар өсөн дэвжиж байна. Мэдээлэл олж авах, хүн төрөлхтний мэдлэгийг олж авах, түүнийгээ ажил хэрэг болгох нь цаг ирэх тутам амар хялбар болж байгаа юм. Банк санхүүгийн систем малчны гэрт ороод ирлээ. Одоо чухамдаа уламжлалт ахуйгаа орчин үетэй хөл нийлүүлэн хөгжүүлэх боломж бидэнд нээлттэй байна. Энэ номонд Гондурас, Мексик, Перу, Бразил, Чили, Танзани, Уганда, Малави, Энэтхэг, Тайланд, Солонгос, Филиппини гээд олон орны тодорхой бүтээгдэхүүнд суурилсан үнэ цэнийн хэлхээг харуулсан болно. Сонгосон бүтээгдэхүүн нь тухайн улсын байгаль, цаг уурт зохицсон, бусад оронд бага эсвэл огт үйлдвэрлэгддэггүй, тухайн улсынхаа харьцангуй давуу талыг үүсгэдэг, ахуй амьдралынх нь онцлогт нийцсэн хүн ам нь хамгийн ихээр хамрагддагаараа ажлын байр, амьжиргааны эх үүсвэр болдог нь ажиглагдаж байна. Энэ нь манай хувьд мал аж ахуйтай төстэй юм. Номын дийлэнх жишээ газар тариалан, агро-бизнест илүү түшиглэсэн хэдий ч манай нөхцөлд энэ нь арай өргөн хүрээнд тухайлбал МАА, газар тариалан, хүнсний салбарт хэрэглэгдэх боломжтой загварууд учир зарим газар тариалан, агробизнес гэсэн илэрхийллийг Хүнс, ХАА-н салбар гэж томьёолсон болно.