Зохиол Монголын нийгэм шилжилт хийгээд удаагүй байсан 1998 онд эхэлдэг. Улаанбаатар хотын олон арван дунд сургуулийн төгсөх ангид элсэн орох хөвгүүнээр гол дүрээ сонгож. Хувь тавилангаар юм уу эсвэл ямар нэг далдын хүчээр ч юм тэр нэгэн өдөр үеийнхээ охинтой танилцдаг. Эндээс бүх зүйл эхэлдэг бас дуусдаг.
Номыг бичихдээ хэд хэдэн зүйлд онцгойлон ач холбогдол өгсөн юм.
1. Location. 1998 оны оны Улаанбаатарын зарим газрыг тэр чигт нь бодитоор буулгасан. Ямар нэг хүч оруулах гэсэн хүсэл тээгээгүй бөгөөд бодит дурсамжийг авч ирэх гэсэн энгийн санаа.
2. Дуу хөгжим. Боломжтой бол зохиолд гарах дуунуудаар лист үүсгээсэй гэж хүсэж байна.
3. Уран тансаг уянгалж эсвэл хайрын бал бурам мэтийн гялгар үг хөөцөлдсөнгүй. Түүний оронд ...тоот троллейбусаар өнгөрсөнд үүрд үлдсэн тэр дурсамжуудад аваачих гэсэн юм.

Нууц болоод үнэний талаар ондоо ойлголттой сэтгэл зүрхүүд хаа нэгтээ огтлолцоно гэж найдсаар он жилүүдийг элээнэ. Тэр хооронд зөвхөн шаналахаас цаашгүй. Өөрт бүх зүйл зогсонги мэт санагдавч бодит ертөнцийн цаг хугацаа хүлээнэ гэж үү ?
Уншигч авхай та энэхүү номыг уншиж дуусаад санаа алдах вий. Юу болоод өнгөрөв гэж гайхширсандаа бус зүгээр үүлсийг харан санаа алдаж байгаагаар төсөөлж байна. Тэгээд номын сангийнхаа хамгийн булангийн, хүн хар хэрэг болгож гар хүрээд байхааргүй, нүдэнд тусах нь бага хэсэгт номыг маань байршуулаасай гэж хүснэ. Тэр байршилд өөрийн гэсэн орон зайтай байх нь номын хувьд хүссэн тавилан нь юм.
Үнэн үүрд байдаг. Хажууханд. Чихний омгоос миллиметрийн зайтай. Амьсгалж, аргадаж хажууд оршдог.