<p>Энэхүү "Ламын гэгээний шавийн түүх, соёл" 2 боть номын "Ламын гэгээн шавийн түүх" 1-р ботид Сайн ноён хан аймгийн Эрдэнэ бандид хутагтын шавийн түүх, Ламын гэгээний анхдугаар дүр Хамба ханчин номун хан Лувсанданзанжанцан, түүний залгамж дүрүүдийн намтар цадиг, шавь олны эрхлэх аж ахуй, овог гарал, зан заншил, цуутай бөхчүүд, уран дархчуул, нутаг усны онцлогийн тухай өгүүлсэн болно. Мөн 1930-аад оны их хэлмэгдүүлэлтийн жилүүдэд ор мөргүй болж устгагдсан Баянзүрхийн хүрээний сүм дуган, бурхан шүтээн, хурал ном, сургууль дацан, шашин соёлын зан үйлийг нүдээр үзэж биеэр оролцсон сүүлчийн гэрч нарын аман хууч, холбогдох эх сурвалжийг баримтлан бодитойгоор бичиглэн үлдээсэнд уг номын ач холбогдол оршино.</p><p>Энэхүү "Ламын гэгээний ханчин дэг, ёслол зан үйл" нэртэй 2-р ботид Ламын гэгээн Лувсанданзанжанцан хутагтын тогтоон төлөвшүүлсэн "Ханчин дэг"-ийн бүтэц агуулга, тархац, онцлогийг тодотгон тайлбарлаж, Бурханы шашны ёслол, зан үйлийн сонгодог уламжлалыг Монгол соёл, нүүдлийн иргэншлийн уугуул хөрсөн дээр идээшүүлсэн цогц асуудлыг тухайлан авч үзсэн бөгөөд Ламын гэгээний хүрээнд уламжлал болон зохиогдож байсан шашны ёслол, зан үйлийн төрөл зүйлсийн онцлогийг бичгийн болон аман сурвалжаар мөшгөн тодруулж, цам харайх, майдар эргэх, уул овоо тахих зэрэг өргөн олныг хамарсан цогц зан үйл, хурал номын хөгжим, ая дангийн жишээгээр бататган тайлбарласан болно.</p>