Япон хэл бие даан сурагсад хирагана катакана үсгээс эхлэн сурах шаардлагатай болдог бөгөөд энэ ном дүрсийн ой санамжийн аргаар мартахгүйгээр япон цагаан толгойн эдгээр үсгийг хурдан сурахад таныг хөтлөх болно. Жишээлбэл хирагана あ (а) үсгийг үүнтэй төстэй дүрстэй анар жимсээр төлөөлүүлэн үзүүлсэн. Японд ажиллах сурах төлөвлөгөөтэй хүмүүс, анхлан сурч байгаа сургуулийн хүүхдүүд аль аль нь энэ аргаар амархан сурах болно гэж найдаж байна. Япон ном сонины текстийн 43 % нь хирагана катакана үсгээр, 41 % нь ханзаар, 2 % нь тоо, цифр, үлдсэн нь цэг таслал гэх мэт тэмдэгтээр бичигдсэн байдаг.

Гадаад үг бичих хэрэгцээнээс япон хэлэнд сүүлийн 100-аад жилд шинээр үүссэн үсгүүдийг энэ номд оруулсан нь онцлог юм. Чэкаут, (валютын) чэйнж, Цюрих хот, форматлах... гэх зэрэг гадаад нэр, шинжлэх ухаан техникийн үг хэллэгийг бичихийн тулд ийм үсгүүдийг хирагана катаканагас эвлүүлэн үүсгэсэн бөгөөд эдгээрийг нэгтгэн тайлбарласан ном монгол хэл дээр өдгөө байдаггүй юм.

340 жишээ үг орсон бөгөөд үзсэн үгээ та мартвал номын арын хэсэгт оруулсан монгол болон япон дарааллаар хайх жагсаалтаас хялбархан олж болно. Япон цагаан толгой, хирагана катакана үсгээ хялбархан сураарай. А5 хэмжээ, 110 хуудас.