Уламжлалт анагаах ухаанд олон зуун жилийн тэртээгээс өргөн хэрэглэгдэж ирсэн боловч гарал үүсэл, химийн бүтэц, найрлага, үйлдлийн механизм нь одоо хүртэл тодорхой бус байгаа байгалийн гаралтай биологийн идэвхт нэгдлүүдийн нэг нь барагшун юм. Энэхүү номонд монгол оронд тархсан барагшунд хүн, малын биед ашиг тустай ямар төрлийн бодис байдаг, тэдгээр нь ямар өвчинг анагаах чадалтай байх, эдгээр бодисын хүн, малын биед үзүүлэх нөлөөг лабораторийн нөхцөлд бий болгосон хиймэл орчинд (in vitro) болон туршилтын загвар амьтанд (in vivo) туршин сорьж гаргасан үр дүнгийн талаар дэлгэрэнгүй өгүүлэх болно. Мөн барагшуныг хэрхэн цэвэршүүлэн ариутгах ёстой, ариутгаагүй байгалийн барагшун ямар хэмжээний бохирдолтой байдаг зэргийг шинжилсэн шинжилгээний дүнг харьцуулан үзэх боломжтой. Барагшуны шинжилгээ, туршилт, сорилтын үр дүнг шинжлэх ухааны хялбаршуулсан хэлбэрээр бичсэн тул уншигч хэн бүхэнд ойлгомжтой сонирхолтой байх болно. 25 жилийн туршилт, судалгааны дүнд бий болсон барагшун агуулсан бэлдмэлийн талаарх сонирхолтой туршилт, сорилтууд, хэрэглээний талаар бүрэн ойлголт, мэдээллийг уншигч та энэхүү номноос аваарай.