Дорноговь аймгийн Равжаа судлалын музейд хадгалагдаж буй арван дэвтэр хийгээд академич Ц.Дамдинсүрэнгийн гэр музейн хөмрөгт буй горимын 3 дэвтэр эхийг дурдаж болно. Судлаач дээрх горимын дэвтрүүдийг хавтасны нь өнгөөр «Улаан горим», «Цэнхэр горим» гэж нэрлэж бичсэн байна. Уран зохиол судлагч доктор (Sc.D) С.Хөвсгөл «Саран хөхөөний намтар» жүжгийн зохиолын шинжлэл, бичвэр судлал» хэмээх бүтээлдээ '2011' Дорноговь аймгийн Равжаа судлалын музейд хадгалагдаж буй 431 нүүр бүхий улаан хавтастай 10 дэвтэр бичвэрийг эрдэм шинжилгээний галиг үсгээр буулгаж, түүнийгээ өргөн олон уншигчдад хүргэх зорилгоор монгол шинэ үсгээр буулгаж, улмаар эл ховор дурсгалын эхийг гэрэл зургаар хавсарган нийтлүүлсэн нь эрдэм шинжилгээний хувьд чухал ач холбогдолтой бүтээл болсон юм. Нөгөөтэйгүүр эл жүжгийн зохиолоос дундад зууны үед нүүдэлчин монголчууд театрын урлагийн суурийг тавьж, эртний уламжлалт харилцаа дууныхаа ул ухааныг шингээсэн өвөрмөц маягийн дуулалт жүжгийг хэрхэн туурвиж байсныг бас олж үзэж болох юм. С.Хөвсгөл энэхүү номондоо зөвхөн кирилл бичгийн хөрвүүлэг, өөрийн судалгаа хоёрыг оруулснаараа зөвхөн судалгааны хэрэгцээнд зориулагдсан төдийгүй өв соёлоо сонирхогч хэн бүхэнд хэрэгцээтэй бүтээл болжээ.