Энэхүү номыг бүтээгч эрхмүүд нь үндэсний болон гадаадын хөрөнгө оруулалттай уул уурхайн хамтарсан үйлдвэрүүд, тэр дундаа зэс молбиден, зэс алтны ордуудыг ашиглах үйлдвэрүүдийг байгуулахад гар бие оролцож байсан, энэ талаар өргөн мэдлэг, туршлагатай эрдэмтэн судлаачид билээ.
О.Эрдэнээ, Д.Галсандорж нарын “Оюу толгой болон Эрдэнэт үйлдвэрүүдийн олон улсын өрсөлдөх чадварын харьцуулсан судалгаа” энэхүү ном нь олон улсын төвшинд Монгол улсын зэсийн үйлдвэрүүдийн одоо болон ирээдүйн олон улсын өрсөлдөх чадварыг судалсан шинэлэг бүтээл болсон нь сайшаалтай.
Оюу толгой үйлдвэрийг барьж ашиглалтад оруулсан их бүтээн байгуулалтын энэхүү түүхэн он жилүүд нь манай улсын зах зээлийн эдийн засагт шилжих шилжилтийн цаг хугацаатай давхцаж байгаагаараа ихээхэн онцлогтой билээ.
Энэхүү ном нь Монгол улсын зэсийн салбарын олон улсын өрсөлдөх чадвар, байр суурь, Оюу толгойн уурхайтай ижил төстэй дэлхийн зэсийн тэргүүлэх 15 уурхайн танилцуулга, манай улсын зэсийн үйлдвэрүүдийн өнөөгийн байдал, хэтийн төлөв, Оюу толгой болон Эрдэнэт үйлдвэрүүдийн өрсөлдөх чадварын харьцуулалт, Оюу толгой үйлдвэрийн өрсөлдөх чадварыг дэлхийн ижил төстэй зэсийн тэргүүлэх 15 уурхай, үйлдвэрүүдтэй харьцуулсан судалгаа, зэсийн баяжмалын үнэ цэнийг тооцох олон улсын аргачлал, түүний хэрэглээ зэрэг бүлгүүдээс бүрдэж байна.
Монгол улсын уул уурхайн салбарын тэргүүлэгч үйлдвэр Оюу толгой үйлдвэрийн хөгжлийн түүхэн замнал нь манай уул уурхайн бусад компаниудад жишиг болж, дэлхийн тавцанд өрсөлдөх чадвартай, улс орны хөгжилд үр өгөөжтэй компаниуд болон өсөн дэвжихэд нь үлгэр жишээ, туршлага сургамж болох нь дамжиггүй.