Амьдралаа өөрийнхөөрөө бүтээх хүсэл мөрөөдөлдөө хөтлөгдөн далай мэт амьдралд луужинтай далбаат завь адил эрч хүч дүүрэн амьдарч яваа ухаалаг, хүчирхэг эмэгтэй танд энэхүү номыг сонгон уншиж байгаад тань гүн талархал илэрхийлье.
Өмнө нь бичсэн “Эмэгтэйчүүдийн үнэ цэн, эрх мэдэл”, “Эмэгтэйчүүдийн хүчирхэг оршихуй”, англи хэл дээр бичигдсэн “Women power and leadership” номуудыг уншсан олон уншигч маань энэхүү “Хэзээ ч битгий бууж өг” номыг бүтээхэд асар их урам, эрч хүч бэлэглэсэн билээ. Та нараасаа ийм том бэлэг хүлээн авч байгаа нь надад олдож буй ховорхон хувь тавилан юм. Хүүхэд төрүүлэх, ном бичих, мод тарих гурван буян бий гэдэг. Миний хувьд ном бичнэ гэдэг өөртөө болон өрөөл бусдад зориулан бэлэг бэлтгэхтэй адил. Гэхдээ энэ бэлгийг би ганцаараа бүтээдэггүй, хүндэт уншигчдынхаа сэтгэлийн дэм, урмын үг, чин сэтгэлийн зөвлөгөөнүүд болон амьдралын гайхалтай түүхээр бүтээдэг болохоор та нар миний хамгийн дотны туслагчид билээ.
Хорвоо ертөнцөд баяр хөөр, уйтгар гуниг, сайхан муухай, жаргал зовлон зэрэгцэн оршдог ч энэ бүхнийг тэвчээр зааж, ухаанаар зохицуулж, хайраар тэтгэж, уучлалаар зөөллөж, ялагдаж байсан ч ялах хүртлээ бууж өгөлгүй тэмцсээр амьдралын сайн сайхныг амсах нь таныг улам хүчирхэг болгох нэг шалгуур юм. Яг одоо энэ номыг гартаа барьж байгаа тань хүртэл хүссэн зүйлдээ хүрч болохуйц арга замыг эрж хайх хүсэл тэмүүлэл, хүч чадлыг тань илэрхийлж байна. Эмэгтэйчүүд бидэнд хүчирхэг оршихуйн түлхүүр бий. Гэхдээ энд яригдаж буй хүчирхэг оршихуй нь эмэгтэй хүн босс шиг байх тухай биш харин эрч хүчтэй, гал цогтой, өөрийн гэсэн байр суурьтай байх тухай юм. Эмэгтэйчүүд бидний хамгийн агуу хүч бол дотоод сэтгэлийн мөн чанар бөгөөд “Биеийн хүчээр нэгийг, билгийн хүчээр мянгыг” гэдэгчлэн амьдралд тохиолдох олон даваа нугачааг хурц ухаанаараа, сэтгэлийн тэвчээрээрээ ялж чадах агуу хүч билээ. Хүчирхэг эмэгтэй замд тохиох даваа, бартаанд бүдчин, тэмтчиж болох боловч хүсэл зорилгынхоо төлөө эцсийн цэгт хүртлээ хамаг сэтгэл зүрх, оюун ухаан, авьяасаа дайчилж чаддаг онцгой чадвартай. Ийм гайхамшигт хүч та бүхэнд бий. Түүнийг хэрхэн ухаалгаар ашиглаж чадах нь зөвхөн танаас шалтгаална.
Хүн юу тарина түүнийгээ хураадаг гэдэг. Хүн ном авсандаа харамсдаггүй, өөрөө уншсаныхаа дараа бусдад санал болгож, эсвэл бэлэглэж улам түгээж явдаг. Хэдийгээр талх шиг борлогдож, ашиг орлого олдог зүйл биш ч тархи минь үргэлж баяжигдан байдаг болохоор ном бүтээж бусдад хүргэх энэ ажилдаа би үнэхээр дуртай. “Хүн хэдий ухаантай ч хэлэхээс нааш” ухаардаггүй гэгчээр амьдралын энэ их давлагаан дунд амжилттай аялахад тань энэ ном нэг ч болов авууштай, өөртөө тусгах санаа, итгэл өгч чадна хэмээн найднам. Мөн эмэгтэйчүүдэд зориулагдсан гэх боловч “ухаантай хүн ухасхийгээд мэднэ” гэгчээр эрчүүд ч гэсэн уншиж, амьдралдаа хэрэгжүүлэхэд илүүдэхгүй биз ээ.

ТАНЫ ЗОРИЛГО БИЕЛБЭЛ, МИНИЙ Ч ЗОРИЛГО БИЕЛНЭ.
Боловсролын удирдахуйн ухааны доктор, судлаач Н.Ундармаа