Кавабата Ясүнари 1937 онд анхны роман болох “Цасны орон”-оо хэвлүүлсэн нь Японы утга зохиол дахь түүний байр суурийг зүй ёсоор бэхжүүлж чадсан хэмээн үнэлэгддэг. Японы уламжлалт соёл, тэр дундаа Зэн буддизмын гоо сайхныг бишрэгч, үхэл хийгээд амиа тэвчихүйг дээдлэгч тэр бээр энэ л өнцгөөсөө “Цасны орон” романаа бичсэн гэдэг. Мөнхүү романдаа тэр орь ганцаардал хийгээд тусгаарлагдмал байдал, түүн дундах хайрын сэтгэлийг хүслэнт, романтик ахуйгаас нь төгс төгөлдөрт хүртэл нь бичихдээ уламжлал-шинэчлэл, төсөөлөл-бодит байдал, гоо сайхан-үхэл мөхөл зэрэг эсрэгцлүүдийг Цасны орны нэлэнхүй, хүйтэн үзэсгэлэнт дэвсгэр дээр тод томруун зурайтал дүрсэлжээ. Түүний гойд уран яруу, нэн тод дүрслэл бүхий бичвэрийн арга барил нь хожим 1968 онд Нобелийн шагнал хүртэхэд нөлөөлсөн нь гарцаагүй бөгөөд Нобелийн хорооноос эш татсан гурван романы нэгэнд “Цасны орон” роман нь нэрлэгдсэн билээ.