Зохиолч, яруу найрагч Чинагийн Галсангийн Аянгат цагийн тууж шинэчлэгдэн хэвлэгдэж өдгөө Интерном номын дэлгүүрийн шилдэг борлуулалттай номын жагсаалтыг 6 дахь долоо хоногтоо тэргүүлж буй.
Тэгвэл уг туужийн дүү, "Арван сарын тэнгэр дор" тууж нь ч шинэчлэгдэн хэвлэгдэж байна. Ийм л урин дулаан намраар, ийм л сэтгэлд дулаахан дүрүүдтэй уулзах завшаан та бидэнд тохиож байгаа нь хэчнээн сайхан.
Нэгэн насны учрал шиг нэгэн өдрийн учрал байдаг аж. Ийм л нандин учралаар туужийн баатрууд учирч, өөрсдийн өнгөрсөн амьдрал хийгээд ирэх ирээдүйн тухай чин сэтгэлийн угаас ярилцана. Чухам энэ учралын эзэд бол яруу найрагч залуу, гэрэл зурагчин бүсгүй хоёр юм. Мартаж чадамгүй хүн шиг, хэзээ ч мартамгүй тийм л дотно дүрүүд. Бидний ч нэг өдөр ийм л хайрлам, ийм баялаг байвч, бид санаж сэрэлгүйгээр амьдардаг нь даанч хайран...
“Чинагийн Галсан” цувралаа бид зохиолчийн эх орондоо ч, эх дэлхийд ч түгсэн олон сайхан бүтээлээр нь баяжуулан, уншигчдадаа хүргэх их ажлыг эхлүүлж буйгаа дуулгаж байгаадаа баяртай байна.