Шүүхийн журмаар гэрлэлт цуцлалтаас үүсэх хүүхдийн эрхийг хамгаалахад тулгамдсан асуудлыг хэрхэн шийдвэрлэх вэ? гэсэн асуултын хариу олохын тулд хөтлөгдөн энэхүү судалгааны ажлыг хийж гүйцэтгэж нийтийн хүртээл болгож байна.
Юуны өмнө, сэдвийн онолын хүрээнд Монгол Улсын шүүхийн журмаар гэрлэлт цуцлалтаас үүсэх хүүхдийн эрхийг хамгаалахад холбогдох эрх зүйн зохицуулалтыг судалж, дүн шинжилгээнд үндэслэн эрх зүйн тулгамдсан асуудлыг тодорхойлж, цаашид хэрхэн нэмэлт, өөрчлөлт шинэчлэлт хийх эрх зүйн шийдлийг боловсруулсан.
Харьцуулсан судалгааны хүрээнд Их Британи Улс, ХБНГУ, БНСУ, БНФУ, БНХАУ, мөн Австрали Улс зэрэг улс орны шүүхийн журмаар гэрлэлт цуцлалтаас үүсэх хүүхдийн эрхийг хамгаалах эрх зүйн зохицуулалтыг судалж, улмаар Монгол Улсад нутагшуулж болох эрх зүйн зохицуулалтын талаар өөрийн санал, дүгнэлтийг дэвшүүлсэн.
Харин шүүхийн практик судалгааны хүрээнд Монгол Улс ба БНХАУ-ын шүүхийн журмаар гэрлэлт цуцлалтаас үүсэх хүүхдийн эрхийг хэрхэн хамгаалж буй эсэхэд түүврийн аргаар 360 шүүхийн шийдвэрт дүн шинжилгээ хийсэн.
Энэхүү судалгааны ажлын үр дүнд Монгол Улсын шүүхийн журмаар гэрлэлт цуцлалтаас үүсэх хүүхдийн эрхийг хамгаалахад тулгамдсан асуудал болох хүүхдийн дээд ашиг сонирхлыг хангах зарчим, хүүхдийн асрамж тогтоох, хүүхдийн тэтгэлгийн хэмжээг тогтоох стандартыг боловсруулах, хүүхдийн тэтгэлэг төлөөгүй тохиолдолд хүлээлгэх хариуцлага, хүүхдийн эцэг, эхтэйгээ уулзах эрхийг хангах, мөн хүүхдийн эд хөрөнгийн эрхийг хамгаалах талаарх санал, дүгнэлтийг дэвшүүлсэн. 2023 онд Хүүхэд хамгааллын тухай хуулийн шинэчилсэн төсөл мөн Гэр бүлийн тухай хуулийн шинэчилсэн төсөлд өөрийн судалгааны ажлын үр дүнд боловсруулсан санал, шүүмжийг тодорхой үе шаттай дэвшүүлж байсан.