Танд өөртэйгөө ярилцах хэрэгцээ, шаардлага байна уу? Өөрийгөө таних, өөрийгөө хайрлах, өөрийгөө олох гэж юуг яриад байна. Би тийм төөрсөн амьдралаар амьдарч ирсэн юм байх даа...Асуулт хөвөрнө...Зарим нь гайхна, зарим нь шоолно, зарим нь тохуурхана, зарим нь хайсаар л...

Өөрийгөө хайрлана гэдэг нь юун тухай юм бол? Хувиа хичээсэн хүний үг юм болов уу? Эсвэл ний олонд хамаатай үг юм болов уу? Хүн хайраас үүссэн хайрын бүтээгдэхүүн. Таны дотоодын мөн чанар ХАЙР юм. Хайрыг асаах нь ГЭРЭЛ юм. Гэрлийг асаах хүртэлх үйл явц ӨӨРӨӨ ӨӨРИЙГӨӨ ХАЙРЛАХ философи юм. Бид нүдэнд ил харагдах махан биеэ мэддэг шигээ өөрийн дотоод сэтгэлзүйгээ төдийлөн сайн мэддэггүйгээс амьдралын бүхий л талбарт санаатай болон санамсаргүйгээр алдаа гаргасаар, нийгмийн харилцааг ойлгоход бэрхтэй ч юм шиг, өөрийгөө илэрхийлэх дургүй ч юм шиг, цаашлаад ганцаардах, сэтгэлд гутралд орох, гацах, тав тухын бүсдээ шигдэх зэрэг сөрөг байдалд хүрнэ. Хүний хэрэгцээт материаллаг зүйл цөм байгаа хэдий ч зүрх сэтгэлдээ нэг л дундуур, дутуугийн мэдрэмжтэй...Яг юу юм вэ? гэдгийг мэдэхгүй гацна. Яг юунаас болоод байгаагаа ч мэдэхгүй, ойлгохгүй, уурлана, бухимдана, харамсана, бусдыг буруутгана, гомдооно, гомдоно. Асуултын хариулт тус номд бий.