Би бүх нийтэд үйлчлэх ёс суртахууны тал дээр шашнаас ангид шинэ арга барил бий болгох нь боломжтойгоор барахгүй үр дүнтэй гэдэгт бүрнээ итгэдэг. Яагаад тийм итгэлтэй байна вэ гэвэл бид бүгдээрээ хүн төрөлхтөн нийтээрээ сайн гэж үздэг зүйлс рүүгээ тэмүүлдэгт би бат итгэдэг юм. Хүн юу ч хийсэн түүнийгээ ашиг тустай л гэж хийдэг. Түүнчлэн бид бүгд бусдын сайн сайхан сэтгэлд баярладаг. Хүмүүс бид байгалиасаа хайр, энэрэн нигүүлсэх сэтгэл гэсэн хүний үндсэн мөн чанартаа тэмүүлдэг. Бид бүгд л хорсол зэвүүцлээс илүү хайрыг эрхэмлэж, харамж хахирган зангаас өгөөмөр байхыг илүүд үздэг шүү дээ. Хэн л хэт туйлширсан, бусдыг үл хүндэтгэсэн, атаа хорсол тээсэн хүнийг бусдыг ойлгодог, хүндэлдэг, энэрэнгүй хүнээс илүүд үзэх билээ дээ ?. Энэ үзлээс улбаалан би дотоод үнэт зүйлийн тухай ойлголтыг ямарваа шашинтай үл харгалдуулан, дээрээс нь хамгийн гол нь шашнаас огт хамааралгүйгээр өгөх боломж, арга зам бий гэж бат итгэж байгаа юм. Ёс суртахууны энэ шинэ төсөөллийг бий болгох, хэрэгжүүлэх талаар энэхүү номд өгүүлэхийг зорилоо. Үүгээрээ хэтийдсэн материализмын энэ эрин үед ёс суртахууны тухай ойлголт, дотоод үнэт зүйл ямар хэрэгтэйг таниулахад тус болно хэмээн найдаж байна...

Дээрхийн Гэгээн XIV далай лам Данзанжамц