Парис хот магадгүй хүн бүрийн мөрөөдлийн хот болов уу. Парис гэхээр урлагийн хот, дурлалын хот, загварын хот, түүхэн хот зэргээр хүн бүрд өөр өөр мэдрэмж, дурдатгалыг төрүүлдэг. Парис хот нь Бүгд Найрамдах Франц Улсын нийслэл төдийгүй Иль-де-Франс муж болон Парисын метрополитан бүсийн төв юм. Парис хот нь цагийн зүүний дагуу эргэлдэх мэт дугуйран байрлах 20 дүүрэгтэй бөгөөд дүүргүүдээ нэгдүгээр, хоёрдугаар гэх мэтчилэн дэс тоогоор дугаарласан байдаг. Харин нутгийн иргэд Парис хотыг Сена мөрний дагуу 2 хуваан баруун эсвэл зүүн эрэг хэмээн ярих нь элбэг. Парисын хүн амыг 2 сая гаруй гэдэг ч дагуул хотуудыг оруулан метрополитан бүсээрээ авч үзвэл 11 сая орчим хүн амтай.

Өнөөгийн соёлт ертөнцөд үнэлж баршгүй хувь нэмэр оруулсан хот бол яахын аргагүй Парис хот. Гэрлийн хот гэгдэх Парис танд соёл, урлаг, утга зохиол, уран сайхныг иж бүрнээр нь таниулахаас гадна дэлхийн худалдаа, үйлчилгээ, хөгжил цэцэглэлтийн талаарх өргөн ойлголтыг ч өгөх болно. Тиймдээ ч магадгүй НҮБ-ын Боловсрол, шинжлэх ухаан, соёлын байгууллага болох ЮНЕСКО-гийн төв нь энэ хотод байрладаг биз ээ. Таны амьдралдаа заавал очих ёстой хотын нэг бол жуулчдыг хамгийн ихээр татдаг дэлхийн шилдэг 10 хотын нэгээр байнга шалгардаг Парис хот билээ. Та Парист ирснээр Эйфелийн цамхгаас алсыг тольдож, Мона Лизагийн инээмсэглэлийг мэдэрч, амтат улаан дарсыг шимээд зогсохгүй өөрийгөө шинээр нээх гайхалтай аяллыг хийх болно гэдэгт итгэлтэй байна. Та энэ номын талаарх санал сэтгэгдэл, номын мөрөөр эсвэл номд багтаагүй өөр олон сайхан газар байгааг өөрийн биеэр үзээд travellersnote@outlook.com цахим хаягаар саналаа илгээж, Парис хотын талаарх бодлоо хуваалцаарай. Хайр дурлал, аз жаргалаар богцоо дүүргээд Парис хотоор ахин дахин аялахыг танд хүсэн ерөөе!