1990-ээд оны үеэс бий болсон "Чингийн шинэ түүх" хэмээх судалгааны шинэ хандлагаас үзвэл,  манж нар Хятад болон Төв Азийн төрт ёсны уламжлалыг хослуулсан, "олон үндэстний" (multi-national) "олон соёлт" (multi-cultural) улсыг байгуулжээ. Тийнхүү манж нар Хятад болон Төв Азийн төрт ёсны уламжлалыг хослуулсан "олон үндэстний", "олон соёлт" улсыг байгуулахдаа засаглал, эрх зүйн олон талт шинж чанартай бодлого явуулж байв. Тодруулбал, нэг газар нутагт хоёр ба түүнээс дээш уг гарал бүхий хууль эрх зүйн тогтолцоог нэгэн зэрэг хэрэгжүүлэх үзэгдлийг эрх зүйн олон талт тогтолцоо (legal pluralism) хэмээн тодорхойлох бөгөөд Манжийн эрхшээлийн үеийн монголчуудын эрх зүйн тогтолцоо нь "олон талт" (pluralistic) "холимог" (hybrid) шинж чанартай байсан билээ.

Ийм нөхцөлд, монгол эмэгтэйчүүдийн нийгэмд эзлэх байр суурийг түүхэн үүднээс судлах, ялангуяа XX зуунд "орчин үед" буюу феодалын нийгмээс социалист нийгэмд харьцангуй богино хугацаанд шилжсэн нийгмийн урьдач нөхцөл болох Манжийн эрхшээлийн үеийн монгол эмэгтэйчүүдийн нийгмийн байдал, эрх ашиг хэрхэн хөндөгдөж, тэдгээрийг эрх зүйн орчинд хэрхэн шийдвэрлэж байсныг тухайн үеийн улс төр, нийгмийн харилцааны онцлогт тулгуурлан тодруулах нь энэхүү бүтээлийн гол агуулга, зорилго юм.

Хүндэтгэсэн

Ч. Удаанжаргал