Бяцхан Ариунзаяаг олох үед үл үзэгдэгч мэт дуу хоолой нь сул, эмзэг нандин оршихуй байлаа. Түүнийг сайн сонсохын тулд чих тавин хичээхгүй бол хоолой нь сонсогдох төдий намуухан байдаг байв. Амьдралынхаа хамгийн хэцүү үед би түүнтэй танилцаж байсан нь эргээд бодоход хувь ерөөл гэлтэй түүнтэй ярилцаж, дотно танилцах тусам би түүнийг ямар хүчирхэг гэдгийг олж мэдсээр байсан юм. Дотоод хүнтэйгээ ярилцах бүрдээ би ганцаардахаа больж, хэн нэгэнд хайрлуулж хамгаалуулж буй мэт санагдан, бараан бодлуудаасаа бага багаар ангижирдаг болов. Намайг гэх сэтгэлд нь би тун их талархаж, доторх хүнээ хайрлахад анхаарч эхэлсэн юм. Зарим өдөр би бяцхан Ариунзаяаг олж ярилцаж чаддаггүй ч, тэр хэзээ ч намайг орхиогүй. Уншигч та бүхэн энэхүү номоос энгийн нэг охины өөрийгөө олж хайрлан, өөрийн оршихуйг бүтээсэн түүхийн талаар мэдээд зогсохгүй, өөрийнхөө гайхалтай ертөнцийг ч бас урлах урам зоригийг авна гэдэгт итгэлтэй байна.