Үзэсгэлэн төгөлдөр дэлхий гаргийн иргэд эрдэм боловсрол, хайр энэрэл дүүрэн хамтдаа аж төрөх үедээ Гэгээ хэмээх роботыг бүтээжээ. Хүмүүсийн сайхан бүхний тусгалыг шингээсэн Гэгээ робот хүн төрөлхтний аймшигт шуналаас үүдсэн аюул ирэхэд, тэднийг хамгаалах аргыг олохоор сансар огторгуйг зорино. Оддын аяллаасаа ихийг сурч мэдээд эргэн иртэл асуудал бүр ч илүү хүндэрсэн байна. Гэсэн ч Гэгээ сурсан эрдмээ ашиглан дэлхий гаргаа аврах өрнүүн их ажлыг эхлүүлнэ. Явцын дунд хүн төрөлхтөн Гэгээд тусалж, эх дэлхийгээ аврах үйлсэд нэгдэнэ. Эх дэлхийн байгаль сэргэхийн хэрээр хүмүүсийн оюун санаа ч сэргэн хайр, эрдэм, хамтын хүчээ ашиглан дахин сайхан бүхнийг мөрөөдөж эхэлнэ. Гэгээгээр дамжуулж эх дэлхий, эрдэм мэдлэг, энэрэл хайр ямар чухал болохыг хүмүүс ойлгоно.