МУУГЗ, Төрийн хошой шагналт Д.Намдаг (1911-1984)-ийн намтар, уран бүтээл, хэлмэгдэл, урлаг, уран зохиолд хэрхэн хандаж, авьяас билгийг дээдэлж байсан тухай өгүүлжээ. Түүний шилдэг зохиолууд хэрхэн бүтсэн,зарим бүтээл нь хаагдаж хэвлэгдэхгүй байсан, туурвил зүйн онцлог, архивын ховор материал, урьд өмнө хэвлэгдээгүй гар бичмэл, фото, анд нөхөд, үр хүүхдийнх нь дурсамж, Д.Намдаг зохиолчийн намтар, уран бүтээлийн зуун жилийн товчоон (1911-2021), түүний уран бүтээлийг шинжилсэн судлаач, зохиолчдын бичсэн баялаг ном зүйг хамт хэвлүүлжээ. Д.Намдагийн 1920-иод онд Германд суралцаж байсан, хилс хэргээр хоёр удаа шоронд ял эдэлсэн, түүнийг байцааж, мөрдөж, яллаж байсан зэрэг түүхэн баримтуудыг энэ номоос уншиж болно. Эрдэм шинжилгээний судалгаа, хөрөг, эсээ, баримт, аман түүх, бичгийн сурвалж, ярилцлага, тэмдэглэл, дурсамж, баримтат намтар зохиол зэрэг төрөл зүйлүүдээс энэ ном бүтсэн тул нийт уншигчид, судлаачид, зохиолчид, монголч эрдэмтэд, оюутан сурагчид, магистр, докторант, багш нарт чухал гарын авлага болно.