Шинэ ном. Анхны ном. Оюутны ном. Яруу найргийн ном. Шинэ шүлэг. Анхны мөрүүд. Нэн шинэ, залуу үеийнхний шүлэг, сэтгэлгээ, ойлголт, ухаарал, харах хараа сэлтийн төлөөлөл. Төвлөрч буй илэрхийлэл нь дараах утгат санаанд зангидагдсаныг харж бас болно. Ганцаардал, далавч, бороо, дурсамж. Дотогшоо алсран тэмүүлсэн асар том хэр нь бяцхан өрөөндөө бүгэх, бороон дусал эсвэл солонгод хуруугаа хүргэж ямар нэгэн юм тэмтрэх, нэн гүн тэмүүлэлтэй хэр нь хоосорсон тасалгаа. Эдгээр мөр, дүрслэл юуг илэрхийлж чадах вэ. Тун ч ерөнхийгөөр нь харвал нэн шинэ үеийнхний сэтгэл зүйн комплекс, үл тайлбарлагдах хандлага. Харин уран сайхны сэтгэлгээний талаас нь бодвол ерөөс яруу найраг гэж юу вэ гэдэгт хариулах оролдлого гэхэд болно.