Найруулагч Ичинхорлоогийн Нямдаваа зохиолыг нь бичиж ерөнхий найруулагчаар Бэгзийн Балжинням ажиллан 1985 оны 8 сард дэлгэцнээ гаргасан “Би чамд хайртай” киноноос хойш залуу найруулагч Б.Нямдаваагийн бүтээл “Шилжилт” киног эс тооцвол эдүгээ хүртэл өсвөр насныханд зориулсан, тэдний нас сэтгэхүйн онцлогт таарсан дорвитойхон зохиол бүтээл, кино туурвигдаагүй гэж хэлж болохоор.

Хүүхдийн зохиолын төрлөөр бичдэг зохиолч ховор, тэр дундаа өсвөр насны хүүхэд залуучуудад зориулсан бүтээл туурвидаг зохиолч, уран бүтээлчид нэн цөөрсөн энэ цаг үед залуу зохиолч, сэтгүүлч Н.Пүрэвсүрэнгийн “Ариун булаг” кино тууж олны хүртэл боллоо. Сэтгүүлч, зохиолч, Манд.мн сайтын эрхлэгч Н.Пүрэвсүрэнгийн энэхүү кино туужид өсвөр үеийнхний гэнэн цайлган хайр сэтгэл, найз нөхдийн нөхөрлөл, хувиршгүй нандин сэтгэл, хүн чанар, алдаа оноо, зөв төлөвшлийг энгүүн сайхнаар үзүүлэхийг зорьжээ. 2000 оны үеэс нөхөрлөж, хар багаасаа бие биеэ таньсан сэтгэлийн их гэгээгээр өнөөдрийг хүрсэн найзуудын амьдралыг харуулснаар тухайн цаг үед хүүхэд, өсвөр үеийнхэн хэрхэн өсөн торниж байгааг тод томруун харуулжээ.