Батлан хамгаалах салбар дахь эмэгтэй албан хаагчдын (энгийн, цэргийн) эрх тэгш байдлын өнөөгийн нөхцөл, ажил мэргэжил, боловсрол, эрүүл мэнд, үйлчилгээ, ажил үүргийн хуваарилалт, хүртээмжийн хувьд эмэгтэй албан хаагч ба эрэгтэй албан хаагчдын хооронд оршин буй ялгааг тодорхойлсон судалгааны үр дүнд үндэслэн энэхүү бүтээлийг туурвилаа. Энэхүү бүтээл нь Монгол Улсын “Тогтвортой хөгжлийн үзэл баримтлал-2030”-ын хүний эрх, эмэгтэйчүүдийн чадавхыг сайжруулах зорилтыг хангахад болон Батлан хамгаалах салбарын эмэгтэй албан хаагчдын бүтээмжийг нэмэгдүүлэх, бодлого боловсруулах үйл явцад оролцох, нөлөөлөх боломжид тодорхой хувь нэмэр оруулахын зэрэгцээ цаашид хэрэгжүүлэх арга хэмжээ, бодлого, шийдвэр гаргалтад ашиглаж болохуйц судалгааны материал болно.
Тус бүтээлийн 3 дугаар бүлэгт салбарын жендерийн бодлого боловсруулах үйл ажиллагаанд шинжилгээ, үнэлгээ хийж, хэрэгжилтийг илүү хүртээмжтэй, үр дүнтэй байлгах зорилгоор өөрийн сонирхон судалдаг сэдвүүдээр бичсэн судалгааны өгүүллүүдээсээ түүвэрлэн оруулсан. Эдгээр нь эмэгтэйчүүдийн манлайлал, шийдвэр гаргах ажил үүрэгт оролцох байдал, бодлого боловсруулах шатанд дуу хоолойгоо хүчтэй хүргэх боломжид дэмжлэг үзүүлэхийн зэрэгцээ хүний эрх, жендер судлалын чиглэлээр сонирхон судалгаа хийдэг бүхий л хүмүүст хэрэг болох бүтээл хэмээн найдаж байна.