Ээж, эхнэр болсны дараа эмэгтэй хүний амьдрал хэрхэн өөрчлөгддөг вэ? Улсын нийслэл Улаанбаатар хотдоо амьдардаг, хүүхдээ өөрөө харахын зэрэгцээ гэрээсээ ажилладаг жирийн нэгэн монгол эмэгтэйн түүхийг та унших гэж байна.

“ЭХНИЙ ЖИЛ...” бол төгс төгөлдөр ээж, эхнэр хүний дурсамж биш. Харин бүсгүй хүн бүрийн тэр бүр хуваалцаад байдаггүй, заримдаа хэлж зүрхлэлгүй уруул дээрээсээ буцаадаг бодит түүх билээ.

Ээж, эхнэр хүн болж хайрлах, хайрлагдах мэдрэмж, баяр баясал, тайван жаргалтай өдрүүд, өөрөөрөө бахархсан мөчүүд, хүүхдийн өсөлт хөгжил, өхөөрдөм хөөрхөн агшнуудын дурсамж мэдээж бий. Түүнээс гадна төрөлтийн түүх, төрсний дараах сэтгэл зүйн хямрал, хосын амьдралд тулгарах адал явдлууд, үл ойлгогдох гуниг, учрыг нь олохоор хичээсэн эрэл хайгуул, судалгаануудын тухай ч энд хуваалцсан юм.

Энэ ном бол шинэ ээж, бас шинэхэн эхнэрийн өдөр бүр суралцаж, хайрлаж, ухаарч өнгөрүүлсэн нэг жилийн өдрийн тэмдэглэл. Бүсгүйчүүдээ өмөөрч бичсэн зохиогчийн доторх дуу хоолой. Өөрийгөө хайж, алдаж, буцаан олж, шинээр бүтээж, хайрлахыг хичээж буй эмэгтэйн чин сэтгэлийн бичвэр. Зарим нь хөнгөн, багагүй нь хүнд. Эгэл хэрнээ бүгд өөр өөрийн үнэ цэнтэй өдрүүдийн гэрч.