Монгол адуу алс холоос нутгаа тэмүүлэн гүйж ирдэг үү?

Тэр тусмаа алс өрнийн Зүүн Европ, Оросоос, дорно зүг, Зүүн өмнөд Ази Солонгосын хойг, Вьетнамаас, Хятадын өргөн уудам нутгаас монгол адуу мянга мянгаараа гүйж, цөөнгүй нь нутагтаа гүйж ирсэн гэдэг нь үнэн үү?

Бид ямар хэргээр монгол адуугаа харьд хүргэсэн юм бэ? Хүний нутагт хүргэгдсэн монгол адууны хувь заяа хэрхсэн бэ? гээд олон асуултууд ард түмний дунд хариултаа хайн хөвөрч амнаас ам дамжсаар домог яриа болон яригдсаар ирсэн байдаг.

Гэтэл харийн газар хүргэгдэн очсон монгол адуу хэдэн мянган километрийн чанадаас газрын хол, усны урт, замын түмэн бартааг туулан хүйтэнд хайрагдаж, халуунд хатаж, эгц хавцал, битүү ширэнгэ, өргөн мөрөн, өтгөн намаг, өлсгөлөн араатан, үй түмэн харийн хүний гараас мултарсаар эх нутаг, ижил сүрэг, эзэн хүндээ хүрч ирсэн гайхамшигт түүх олон.

Нөгөөтээгүүр хүргэгдсэн газартаа, харьяалагдсан албандаа монгол адууны тэсвэр тэвчээр, хурд хүч, ид хавыг харуулан хариуцсан үүргээ нэр төртэйгөөр дуусгаж, хүний нутагт баатар болж, эх орныхоо нэрийг өндөрт өргөсөөр амь үрэгдсэн, хүлээсэнд баригдсаар, нутгаа санасаар төрсөн нутгийнхаа зүг толгой налуулан унасан мянган мянган монгол адууны баатарлаг хийгээд гунигт түүх ч арвин.

Тэгвэл дээрх олон асуултын хариултыг та бүхэн энэхүү бүтээлээс олж, МОНГОЛ АДУУНЫ өр өвтгөм хийгээд бахархалт түүхийг мэдэх болно.