Таны ойлгож унших чадвараа хөгжүүлэхэд тань туслах 14 чадварыг энэ номд танилцуулж, товч тайлбар болон дасгал ажлуудыг оруулсан. Түүнд суурилан уншиж ойлгох аргуудыг санал болгосон. Хэдийгээр Англи хэлийг онцолж байгаа боловч энэ номд танилцуулж буй аргуудыг Монгол хэлээр болон бусад хэл дээр бичигдсэн материалыг ойлгож уншихад ашиглах боломжтой. Унших материал гэдэгт янз бүрийн хэмжээ, төрлийн цогцолбор, эх, зохиол зэрэг багтаж болно. Бүлэг бүрийн дасгал ажлуудыг сонгохдоо сонирхолтой, хэрэг болохуйц зохиол болон эхийг сонгож, дасгал ажлуудыг зураг, хүснэгт зэргээр баяжуулж тунгаан бодох цаашлаад бичих чадварт туслах дасгал ажлууд оруулж өгсөн. Дасгал ажлууд нь богино хэмжээний эх болон цогцолбороор эхэлж, түүн дээрээ тулгуулан урт буюу хүндэвтэр дасгал гүйцэтгүүлэх зорилготой. Бүлэг тус бүрийн тест, дасгал ажлуудыг дараах гурван түвшинд ангилсан. Түвшин 1 (T1) буюу хялбар, Түвшин 2 (T2) буюу дунд, Түвшин 3 (T3) буюу хүндэвтэр. Номыг бичихэд ойлгож унших чадварын талаарх олон улсын судалгаа, сургалтын материалууд, олон улсын шалгалт, тестүүдийг авч үзсэн. Гол чиг баримжаа болгосон эх сурвалж бол Австрали болон Англи хэлтэй ус орнуудад өргөн ашигладаг ойлгож унших чадварын сургалтын материалууд юм. Түүнчлэн, PISA сургалтын амжилтын олон улсын үнэлгээний ойлгож унших чадварын суурь баримт бичиг, арга зүйн хүрээ, жишиг даалгавруудыг авч үзсэн.