Товшлол гэдэг нь ‘‘товчлох”, ‘‘товших’’ гэсэн хоёр үгийг нийлэмж юм. Товчлох гэдэг нь уншсан дуулсан сонирхолтой, бодууштай зүйлсээ хураангуйлан хуваалцахыг, товших гэдэг нь кийборд дээр хуруугаараа тоншихыг хэлж буй. Үүнийг бэсрэг эсээ гэж ойлгож болно.
Энэхүү номд хүн хэрхэн дотогшоо өнгийж өөртэйгөө ажиллах вэ, хэрхэн бүтээлч хийгээд бүтээгч байх вэ, хэрхэн цэвэр тунгалаг сэтгэх вэ, ажил карьерын талбарт хэрхэн өөрийгөө ахиулах вэ зэрэг сэдвийн хүрээнд 48 бэсрэг эсээ багтаалаа.
Товшлол бичээч миний бие идей буюу санаанд шимтдэг хүн.
Гол төлөв эшлэлээр илэрхийлэгдэх тэрхүү санаанууд нь оюунлаг, сэхээлэг хүмүүс аливаа зүйлийн талаар хэрхэн бодож сэтгэж, хэрхэн ажиглаж дүгнэж байгааг харуулан бидний оюунд оч үсэргэж; бодоогүйг бодуулж, мартсаныг сануулж, санасныг үйлдүүлж байдаг.
Нэг санаа гэдэг нэг цэг гэсэн үг. Хүн тэдгээр цэгүүдийг холбон байж, өөрийн туршлага, ажиглалт дүгнэлттэй хамтатган байж шинэ бодол, шинэ санааг тархиндаа буй болгоно. Миний цуглуулдаг санаанууд дунд эсрэгцсэн санаанууд ч цөөнгүй бий. Ижил төстэй, эсрэг тэсрэг, тэр бүхэн хүнд аливааг олон талаас нь харах, аливаад хүрэх олон зам, олон арга буйг илтгэн үзүүлдэг. Тэр хэрээр хүний оюун санааг илүү нээлттэй, сониуч болгон сэтгэлгээг тэлж хөгжүүлж байдаг билээ.