Дүрслэх урлагт суралцагч нөхөд болон оюутан, магистрант, докторант, урлагийг хүндлэн эрхэмлэгч олонд зориулж 'Уран зураг-Бүтээлч эрэл' номыг өргөн барьж байна. Ном нь 220 нүүртэй, өнгөт зураг, хатуу хавтастай. Хавсралт зургийн тайлбар, индексийн хэсэгт бичвэрт тусгагдсан дэлхийн их зураачдын бүтээлийн онцлогоос тусгав. Мөн холбогдох урсгал чиглэл, мэргэжлийн нэр томъёоны тайлбарыг багтаасан болно. Зохиогч бүтээлч сэтгэлгээ нь уран бүтээлд ямагт тусгалаа олж, хөгжиж боловсордог үйл явцыг өөрийн зураг дээр тулгуурлаж тодруулахыг эрмэлзэв. Мөн уран зургийн бүтээл туурвилын эх үндэс нь болох зохиомжийн боловсруулалтаас эхэлж баримт бүрдүүлэх, эскиз боловсруулах, зургийн дэвсгэрт дээр ажиллах явц, зурах арга ажиллагааны онцлогийг тусгаж, хавсралт зураг сэлтийг сэдэв бүр дээр нь харьцуулан боловсруулав. Холбогдох сэдэв бүр дээр байгаль, нийгмийн орчин, хүний амьдралын онцгой учралыг уран зурагт тусгаж гаргах талаар зураглан үзүүлэв. Түүнчлэн жинхэнэ урлагийн бүтээл нь хүний сэтгэл мэдрэмж, ухаан, туршлагын үр дүнд бий болдог төдийгүй үйлдвэрлэлийн шинжтэй, хуулбарлах хэв маягтай зураг дүрслэлээс эрс ялгаатай болохыг урлагийн сэтгэл судлал, гоо зүй, соёл судлалын шинжлэх ухааны үндэслэлтэйгээр энгийн утга хэллэгээр дамжуулан тайлбарлахыг зорив. Энэ номын гол зорилго нь “Зурж бүтээх бүх боломж бий, харин тэр боломжийг ашиглаж чадаагүйгээс л хоосон хоцордог” болохыг бүтээлч амьдралыг эрхэмлэгч хэн бүхэнд зөвлөхийг чухалчлав. Тиймээс ном нь дүрслэх урлагт шимтэн суралцагсад төдийгүй мэргэжлийн нөхдөд ч мөн бүтээл туурвих урлагийн талаарх нэгэн шинэлэг санаа төрүүлэх учиртай. Уншигч та энэ зохиолоос уран зураг бүтээх үйлийн учрыг ухаарч, зурж бүтээх үйлсдээ тусгаж авна гэдэгт итгэлтэй байна.