Уран сайхны шүүмж гэдэг цэвэр уран бүтээл үү? эсвэл шинжлэх ухааны судалгааны ажил уу? гэдэг асуулт явдаг. Магадгүй тухайн тохиолдол бүр өөр өөрийн шинжтэй байж болох ч, энэ тохиолдолд уран бүтээлийн шинж давамгайлах талтай хэмээх саналыг дэмжмээр байна. Зохиолч тухайн тусагдахууныг тодорхой мэдрэмж, хүртэхүй, илэрхийллээрээ гарган тавьдаг. Харин шүүмжийн ажилд түүнийг хөндөхийн тулд илэрхийлсэн тэр байдлыг нь тусагдахуунтай нь аль болох хамтад нь авч үзэх болдог. Энэ асуудлыг тойрон ярьж болох, магадгүй зохих хариулт ч өгч болох нэгэн ном одоо, таны гарт дээр очиж байна.