Уг цуврал номонд маань хүний амьдралын нугачаанд унаж бүдэрч, ядарч туйлдаж, баярлаж гуниглаж, нулимсаа арчиж явсан олон өнгөт өдөр, сар, он жилүүдэд миний буйдхан амьдралын алдаа онооноос ухаарч өчүүхэн ухаанд минь бүрэлдэн бий болсон туршлага, баяр жаргал, занал хорсол, гал халуун дурлал, гашуудал гомдол зэрэг сэтгэлийн түмэн нугалаанаас урсан гарсан үг бүр минь үсгээр илэрхийлэгдэн шүлэг нийтлэл болон буусан билээ. Би энэ амьдралдаа 'Архи, арчаагүй хүмүүстэй нөхөрлөх нь' хүний амьдралыг сүйрүүлж хэзээ босож сэхэхээргүй болдог болохыг мөн түүнээс хэрхэн ангижрах гэдгийг ухаарч ойлгосон юм. Тэр бол итгэл найдвар. Итгэл найдвар хаана ч байдаг гэдгийг сөнөсөн мэт санагдаж байсан гунигт амьдрал дотроосоо олж хараад өөрөө өөртөө урам зориг, хүч чадлыг тулган шаардаж, хэний ч дор орохгүй юм шүү гэж шүд зууж боссон амьдралын минь нар сая л үүлний цаанаас үүдэн хойморт ирж надад халуун алгаа дэлгэж, харах нүдийг минь хурцалж, хэлэх үг, хийх ажилтай маргаашийн мөрөөдөлд магадгүй түүнээс ч цааш явах хүч чадал болж ирсэн юм. Эхний цуврал номонд маань 130 гаруй шүлэг нийтлэл, дараагийн цувралд маань 1700 гаруй афоризм буюу ухаалаг үгс мөн шинээр бичигдсэн шүлэг нийтлэлүүд багтсан байгаа. Энэхүү 2 номоороо өнөөгийн ороо бусгаа нийгэмд надтай адил амьдралд буруу сонголт болохгүй амьдралд бүдэрч бэдэрч яваа, залуус маань ухаарч, амьдралд итгэх итгэлээ аваасай гэж хэлэхийг зорьсон юм аа. Залуу насны аагаар задарч завхарч яваа нэгэнд нь ташуур, алдаж онож, ядарч туйлдаж, итгэх итгэлгүй нэгэнд нь ухаарал, эрч хүч, итгэл найдвар болно гэдэгт найдаж байна. Номын цагаан буян дэлгэрэх болтугай.