'Засагт ном' нь чухамдаа хятад улсын хамгийн эртний хаант төрийн үйл хэргийн түүхэн явдлыг тэмдэглэсэн түүхийн эмхэтгэл юм. Засагт номын ерөнхий агуулга нь тухайн үеийн хаадын зарлиг, тушаал болон хаан хийгээд түүний ноёд, түшмэд хоорондын төрийн үйл хэргийг явуулах тухай харилцан ярианаас бүтдэг юм. Уг сурвалж бичгийг эртний хятадын хааны ордны тусгайлан томилсон, хаад түшмэдийн үг яриаг тэмдэглэн үлдээх үүрэгтэй түүхийн бичээч нар бичин үлдээсэн ажээ. Тэрхүү түүхийн бичээч нарын тэмдэглэсэн баримтыг нэгтгэж хожим хулсан ном болгосон нь энэхүү 'Засагт ном' юм.