Монголын эртний түүхийн оргил бүтээлүүдийн нэг 'Монголын нууц товчоо' нь дэлхийн түвшинд эрдэмтэн мэргэдийн туурвилын судлагдахуун болж, олон зуун зохиол, бүтээл төрөн гарах үндэс, уг сурвалж болжээ. Их Монгол Улсын нийгмийн амьдралын үзэгдэл, үйл явдал, зөрчил тэмцлийг 'Монголын нууц товчоо' өвөрмөц бичлэгээр өргөн хүрээнд хураангуйлан цогцоор тусгаж, уран яруу үгээр, уран дүрслэлийн аргаар дүрсэлж бичсэн нь бидний судлах сэдвийн хүрээнд багтаж байгаа болно. Тус бүтээл улс төр, удирдахуйн ухаан, дипломат харилцаа, цэрэг стратеги, эдийн засаг, зан заншил, ёс суртахуун, шашин шүтлэг гээд олон шинжлэх ухааны асуудлыг дотроо багтаасан учраас олон салбарын эрдэмтэн мэргэдийн судалгаа шинжилгээний талбар, судлагдахууны эх үүсвэр болсон байна.