Мэдээлэл, харилцаа холбооны салбар дахь орчин үеийн хөгжлийн чиг хандлага өмнө нь хэзээ ч байгаагүй цоо шинэ үр дагавар, үр дүнг үзүүлж байна. 'Мэдээлэл' гэгч нь өөртөө бүтээн босгох болон устган сөнөөх их хүчийг нэгэн адил тээх боллоо. Цаг хугацааны аясаар мэдээллийн мөн чанар өөрчлөгдөөд зогсохгүй мөн түүний нөлөөллийн эрчим хувьсаж байна. Мэдээллийг хэрэглэх контекст ч өөрчлөгдлөө. Тухайлбал, хүний хувийн мэдээлэл нийгмийн шинж чанартай болж, энэ нь мөн алдар цуутай болон улс төрийн зүтгэлтнүүдэд нэгэн адил хамаарна. Улс төр, нийгэм, эдийн засаг, цэрэг дайны гэх мэт нийтийг хамарсан аливаа шийдвэр гаргахад хэвлэл мэдээллийн үүрэг өсч, үүний үр дүнд улс төрийн бодлого нь улам бүр олон нийтийн өнгө аястай, улам бүр залж чиглүүлэгдэх, удирдагдах шинж чанартай болж байна. Энэ болоод бусад асуудлыг хөндсөн уг номыг олон эх сурвалжаас цуглуулан бичсэн бөгөөд зохиогчийн 'Психотрон зэвсэг буюу сэтгэцэд нөлөөт үйлчлэл. Тустай албадын нууц төслүүд' номын хоёрдугаар боть болгон уншигчдад толилуулж байна.