Тус сурах бичиг нь нийт 8 бүлэг сэдвээс бүрдэх бөгөөд долоо хоногт нэг удаа хоёр цагаар, нэг улирлын туршид үзэж судлахад тохиромжтой. Хичээл бүр дүрмийн тайлбар, жишээ, дасгалуудаас бүрдэнэ. Жишээ өгүүлбэрүүд нь гол төлөв монголын алдартай уран зохиолууд, сонины мэдээ зэргээс түүвэрлэсэн бөгөөд суралцагчид багшийн тусламжтай болон бие даан уншиж ойлгох боломжтой. Үүний зэрэгцээ суралцагчид хичээл бүрийн шинэ дүрмийн агуулгыг бататган ойлгоход тус болохоор өгөгдсөн дасгал даалгаврыг хийж гүйцэтгэх нь зүйтэй.
Тус сурах бичиг нь монгол хэлний мэргэжлийн ангийн оюутнуудын дунд шатны монгол хэлний хэлзүйн мэдлэгээ бататгах, улмаар дээд шатны монгол хэлний мэдлэг эзэмшихэд гол үүрэгтэй онол, дадлагын суурь сургалтын хэрэглэгдэхүүн болно. Түүнчлэн монгол хэл сонирхон сурч буй гадаад хүн бүрт монгол хэлний мэдлэгээ сайжруулахад тус дөхөм болох юм.