Дөрвөлжин шугамын аргаар зурсан монгол үндэсний хээ угалзыг уран хатгамал болон гар урлалын бусад төрлүүдээр хэрхэн оёж, урлах вэ гэсэн санаа нь энэхүү номын агуулга болно. Дөрвөлжин шугамын аргыг бид амьдрал дээр хэрээсэн хатгамлын зураг гэж ойлголцдог.

Монгол хээ угалзыг өргөн ашиглах нь үндэсний өв соёлоо дээдлэн хөгжүүлэхээс гадна өөрсдийн оёж урлаж буй бүтээлээрээ дамжуулан хүүхэд, залуучуудаа зөв сэтгэлгээтэй иргэн болж төлөвшихөд ач тус өгөх юм. Жишээ татахад: хэрээсэн хатгамлыг оёдоггүй, мэддэггүй улс орон гэж үгүй...гэхдээ оёж урласан зураг, хээ угалзаараа л улс орнууд ялгарна гэсэн бодол байсан учраас хэрээсэн хатгамлаараа үндэсний хээ угалзаа оёцгооё гэсэн санааг дэвшүүлж байгаа. Мөн дан ганц хэрээсэн хатгамлаар биш бусад хатгамал, гар урлалын төрлүүдээр хээ угалзаа урлах нь нэгэн хэвшмэл хэв маягаас салж бидний урлан бүтээх ажлын цар хүрээ хөгжин тэлэх учиртай гэж үзсэн учраас дөрвөлжин шугамын аргаар зурсан хээ угалзыг хатгамлын төрлүүд, гар урлалын бусад төрлүүдийг оёж урлах арга технологийг оруулж өгсөн. Дэвшүүлж буй энэхүү санаануудыг минь амьдралд хэрэгжүүлбэл ахуйн хэрэглээний эд зүйлс хийхээс гадна ашиг орлогоо нэмэгдүүлэх зорилгоор ч хэрэгжүүлэх боломжтой.

Мөн хэрэглээний энгийн эд зүйлс оёж урлахаас эхлээд урлагийн бүтээл ч бий болгох боломжтой. 'Уран хатгамлаар хээ угалзыг урлах арга' ном нь 100% өнгөтөөр хэвлэгдсэн, хийж урлаж болох оёж урласан жишиг бүтээлүүд, хээ угалзын төрлүүдийн 60 гаруй зургийн хавсралттай, В5 хэмжээтэй, 88 хуудастай, хэмжээний хувьд багавтар ч агуулгын хувьд зохиогчийн ажил амьдралаас урган төрсөн шинэ санааны бүтээл бөгөөд хуулбар бүтээл биш юм.