2007 оноос эхлэн гарсан “Гайхамшигт Амьдрал” сэтгүүлд нийтлэгдсэн ярилцлагуудаас энэхүү номыг бүтээв. “Гайшамшигт Амьдрал” сэтгүүлийн уламжлалт асуултууд “Та амьдралын утга учрыг өөрийнхөөрөө тайлбарлаач”, “Амьдралын гайхамшиг юу вэ”.Амьдралд гайхамшигтай хормууд гэж байдаг шиг амьдралд, түүний утга учрын тухай өгүүлэх гайхамшигтай хариултын хоромууд, тийм үгсийн хосгүй эгшинүүд гэж бас байна. Номд багтсан зохиолч, жүжигчин, дуучин, нийгмийн зүтгэлтэн, эгэл баатрууд тэргүүтэй 39 хүний онцгой хариултууд үнэхээр гайхуулж байна. Гавьяат жүжигчин Б. Сарантуяа: “Амьдралын гайхамшгийг олж харж чадаж байгаа нь өөрөө гайхамшиг” Ардын уран зохиолч Ш. Сүрэнжав: “Амьдрал гэдэг хүн болж төрсөн хувь заяанд л олддог юм” Ардын жүжигчин Ц. Гантөмөр: “Ер нь эцсийн эцэст хүн амьдралд танигддаг. Тэр танигдах амьдралынхаа голдролыг зөв эзэмшиж авах нь чухал” Зураач Д. Уртнасан: “Эцсийн эцэст хүний хөдөлмөр гэдэг чинь агуу их бүтээл шүү дээ” Дуучин Д. Баярцэцэг: “Өөрт тохиолдсон зүйлийг дуучин хүн тэр бүр дуулаад байдаггүй. Дуу амьдралын дундаас дуулагддаг” Ардын жүжигчин Д. Лувсаншарав: “Бүтээл минь тайзан дээр амилна гэдэг гайхамшиг. Энэ бол зөвхөн миний баяр биш, бас тэр тоглож байгаа уран бүтээлчдийн баяр. Тэгээд түүхэнд үлдвэл түүхийн баяр” Яруу найрагч Г. Баяр: “Үнэн өөрөө гоо сайханд хүргэх шат” Ардын жүжигчин Б. Дамчаа: “Би амьралыг эсрэг тэсрэгийн нэгдлийн хууль гэж үздэг. Эерэг сөрөгийн тэнцэтгэл дээр хүний амьдрал тогтох ёстой” Сайн шүлэг, сайхан уран бүтээл гэдэг ерөөс нэгэн сайхан хүмүүн л байдаг. Тэрхүү сайхан хүмүүн л бичиж үлдээхгүй бол, үлдээгээгүй бол, яг түүн шиг дахиад хэн ч бичиж чадахгүй... Орлохгүй... Тэр эрдэнэт мөр, энгүй утгыг. Энэхүү номын ярилцлагууд ч үүний адил эрээлж гоёчилсон зүйлгүй эгэл энгийн мөртөөн хүний амьдралын давтагдашгүй оршихуйг үгсийн хосгүй эгшинээр өгүүлэн хөөрөлднөм бус уу.