Өнөөгийн Монголын байгууллагуудын үйл ажиллагааны үр ашигт байдал, бүтээмжийг дээшлүүлэхэд түлхэц үзүүлэх чухал хүчин зүйл болох ажиллагчдын сэтгэл зүйн байдал, хандлагыг шинжлэх ухаанч онолын үндэслэлтэйгээр олон талаас нь судлах шаардлага амьдралаас урган гарч байна. Ажиллагчдын ажлаасаа авах сэтгэл ханамж, хандлага, байгууллагадаа үнэнч байх хандлага, байгууллага дахь иргэний зан төлөв зэрэгт нөлөөлж буй удирдлагын үйл ажиллагаа, шийдвэрийн оновчтой байгаа эсэхийг тогтоохын тулд судлах шаардлагатай асуудлуудын нэг нь “байгууллага дахь шударга ёс”-ны асуудал юм. Ер нь аливаа байгууллагын амжилт, алдааны цаана хүн л байдаг гэх утгаараа орчин үед, хүнээ буюу ажилтнаа нэн түрүүнд судлах хэрэгцээ улам бүр чухал болсоор байна. Нийгмийн хөгжлөөс шалтгаалан, хүний хөгжил, байгууллагын хувьд ажилтны хандлага, зорилго өмнөх үеүдээс ялгаатайг ойлгож байнга судлах шаардлагатай. Нэг талаар ахмад үеийн туршлага, мэдлэгийг үнэлэн хүлээж авах чухал хэрэгцээ байгаа ч нөгөө талаар XIX-р зууны мэдлэгийг XXI зуунд дамжуулж буй XX зууны багш нараас асар их хүчин чармайлт, хөрвөх чадварыг шаардаж байна. “Сэтгэлийг нь барьчихвал бие нь хаа холдох вэ” гэдэг үг монголчуудын дунд амнаас ам дамжин яригдсаар ирсэн байдаг. Тэгвэл өдгөө, энэхүү ойлголтыг байгууллагын орчинд хэрэгжүүлэхдээ, ажилтнуудын хандлага, түүнд нөлөөлөгч хүчин зүйлсийг илрүүлэн судалж, хэмжигдэхүйц болгон, түүнийг сайжруулах арга замыг хайх нь удирдлагын хувьд нэн чухал болж байна. Шударга ёсны асуудал нь өмчлөлийн хэлбэрээс үл хамааран аль ч байгууллагын хувьд зайлшгүй хөндөгддөг сэдэв юм. Ажилтнуудын цалин хөлсний асуудал, санал гомдлыг барагдуулах, ардчилсан шударга шийдвэр гаргах зэргийн хувьд, шударга ёс нь “хамгийн үндсэн үйл болох нь гайхах зүйл биш” хэмээн философич Ж.Роулс хэлсэн байдаг. Энэхүү судалгааны ажлын хүрээнд тэдгээр шийдвэрийн зөв, буруу эсвэл шийдвэр гаргах гаргаж буй субъектийн талаар бус, харин байгууллагаас гарч буй шийдвэрийг, ажиллагчид хэрхэн хүртэн хүлээж авч байгаа вэ гэдэгт төвлөрөх юм. Удирдлагын зүгээс, өөрсдийн гаргаж буй шийдвэрээ ажиллагчдад зөв зүйтэй “шударга” хэмээн ойлгуулан ухамсарлуулахын тулд авах арга хэмжээг санал болгоно. Тиймээс, сонгон авсан сэдвийн хүрээнд санал болгож буй загварын хувьд, байгууллагын шударга ёс нь багш нарын ажилдаа хандах хандлага болох “Ажилтны сэтгэл ханамж”, болон “Байгууллагадаа үнэнч хандах хандлага”-ын урьдач нөхцөл буюу үл хамаарах хувьсагч нь болно. Сонгон авсан сэдвийн тулгуур онол нь философийн хүрээний “шударга ёс”-ны асуудал боловч, тухайлан судлагдаж буй онол арга зүй нь ерөнхий философийн хүрээнээс нарийсаж, “байгууллагын шударга ёс” гэх байгууллагын зохион байгуулалтын зан төлөвийн хүрээнд хязгаарлагдана.