Манай орны олон их дээд сургуульд суралцагсдын сургалтын төлөвлөгөөнд Органик хими нь үндсэн суурь хичээлийн жагсаалтанд багтдаг болон тэгээд ч үндэсний хэл дээр туурвисан сурах байхгүй байгааг харгалзан энэхүү сурах бичгийг анх зохиосон юм. Номыг зохиохдоо органик химийн үндсэн асуудлын нэг болох орон зайн ба электрон эффект, урвалын механизмын талаар зохих төвшинд анхаарч аль болохоор явцуу биш нийтлэг талыг нь түлхүү анхаарч багцлан тулгуур сурахын хэмжээнд зохиохыг хичээсэн буюу тухайлбал, хэдийгээр энэхүү сурах нь Их, Дээд сургуулийн оюутанд зориулан эмхэтгэгдсэн боловч цаашдын ахисан түвшинд суралцагсад болон бүх шатны сургуулийн багш нарт нэгэн адил гарын авлага болж чадах талаар нь бас тооцсон болно. Орон зайн ба электрон эффект, урвалын механизмын талаар ойлголтгүйгээр тухайн урвал жолоодох боломж үгүй болохоос гадна урвалын үндсэн бүтээгдэхүүний гарцыг ихэсгэж ерөөс чадахгүй. Энэ баримтлал нийгмийн ба бусад Шинжлэх ухаанд ч нэгэн адил мөрдөгддөг билээ. Ингэхлээр онол бол хэрэглээ төдийгүй технологи юм. Ковалент холбооны чиглэлт чанараас шалтгаалан метанаас эхлээд аливаа органик нэгдэл нь орон зайн байгуулалттай (буюу конфигурацтай) ба орон зайн изомер үүсгэх нь нийтлэг тохиолдоно. Органик нэгдлийн хими, физик шинж чанар нь түүний орон зайн байгуулалт, атом ба бүлэг атомын орон зайн байршлаас хүчтэй хамаарна. Ийнхүү органик хими нь орон зайн үзэгдлийн хими (Стереохими) болохын учир дэлхийн жишгийг дагаж энэ утгыг сурах бичгийн нэрэнд шингээлээ. Энэхүү сурах бичгээс уншигч олон Органик химийн талаар сонирхсон асуудлаараа баттай мэдээлэл авч чадна гэдэгт зохиогчид бид итгэж байна.