Эл бүтээл нь дараах дөрвөн зүйлд түлхүү анхаарал хандуулсан болно.
Нэгдүгээрт, хувьцаат компанийн үүсэл хөгжлөөс эхлээд өнөөг хүртэл онолын үндсэн ойлголтыг системтэйгээр тайлбарлахыг оролдсон болно. Хувьцаат компанийн онолын үндсэн ойлголт, бүтцийг авч үзэхдээ компанийн эрх зүйн салбарт хүлээн зөвшөөрөгдсөн судлаачид болох Рэйнер Краакман нар “Компанийн эрх зүйн анатом” (2004), Эгашира Кэнжиро “Хувьцаат компанийн эрх зүй” (2017), Ито Ясүши нар “Компанийн эрх зүй” (2019) бүтээлүүдийг түлхүү ашиглав.
Хоёрдугаарт, Монгол улс дахь хувьцаат компанийн эрх зүйн хөгжлийг судлаачдын бүтээл, хуулийн архивын материалд тулгуурлан авч үзсэн. Монгол улсад хувьцаат компанийн эрх зүй үүсэж хөгжөөд 30-аад жилийг үдэж байгаа боловч судалгааны эх сурвалж төдийлөн бүрдэж амжаагүй байна.

Улмаар өнөөг хүртэлх хугацаанд бий болсон эх сурвалжийг нэгтгэн цэгцэлж, энэ салбар эрх зүйн цаашдын хөгжилд түлхэц үзүүлэхийг зорьсон болно.
Гуравдугаарт, өнөөгийн хүчин төгөлдөр үйлчилж буй 2011 оны Компанийн тухай хуулийн зохицуулалтын онолын ойлголт, практик хэрэглээнд анхаарал хандуулсан. Улмаар хувьцаат компанийн эрх зүйн зохицуулалтыг суурь үзэл санааг тайлбарлаж, шүүхийн практикт гарч буй хэрэг маргааныг тусгахыг эрмэлзсэн.
Дөрөвдүгээрт, хувьцаат компанийн үндсэн ойлголт нь зөвхөн Компанийн тухай хуулиар хязгаарлагдахгүй бөгөөд Үнэт цаасны зах зээлийн тухай хууль, Нягтлан бодох бүртгэлийн тухай хууль, Аудитын тухай хуулийн хэлхээ холбоон дээр тогтдог тул холбогдох салбарын хууль дахь ойлголтыг судалсан болно.
Эцэст нь энэ сурах бичгийн хүрээнд зөвхөн хувьцаат компанийн ойлголтод анхаарал хандуулсан бөгөөд хувьцаат компанид ойртуулсан хүн төвт компанийн хэлбэр болох хязгаарлагдмал хариуцлагатай компани, хүн төвт компанийн үндсэн хэлбэр болох бүрэн хариуцлагатай нөхөрлөл, зарим гишүүд нь бүрэн хариуцлагатай нөхөрлөлийн хүрээнд онолын өөр ойлголт яригдахыг тэмдэглэмээр байна.