Монгол

<p>&nbsp;Бүтээлд музей дэх нэхмэл цуглуулгын хадгалалтыг сайжруулах зорилгоор түүхий эд, материал, улмаар физик, химийн шинж чанар, онцлогийг судалж түүнд тохирсон урьдчилан сэргийлэх хадгалалтын горим, арга зүйг боловсруулан гаргасан. Ингэхдээ Монголын Үндэсний музейн үзүүллэгийн танхим болон сан хөмрөгийн өрөө дэх харьцангуй чийг, дулааны хэмийг гадна орчны агаарын хэмтэй харьцуулж, статистик боловсруулалт хийж дүгнэсэн орчны шинжилгээ, музейн нэхмэл эд өлгийн зүйлийн түүхий эд, материалын болон хэрэглээний, хэмжээсийн төрөл зүйлийн ангиллыг цахим бүртгэлийн програм ашиглан хийж мэдээллийг нэгтгэн дүгнэж, задлан шинжилсэн болно.<br>Судлаач нь музейн эд өлгийн зүйлийн шинж чанар, хадгалалтын зохистой орчны талаар судалгаа, эрдэм шинжилгээний ажлыг байгалийн болон нийгмийн шинжлэх ухааны салбар ухагдахуунуудын хүрээнд хавсруулан хийжээ. Тус нэг сэдэвт бүтээлд “ААТСС ТМ20-2013 – Нэхмэлийн ширхэгтийн анализ” олон улсын стандарт аргачлалын дагуу гэрлийн микроскопийн тусламжтайгаар нэхмэл эд өлгийн зүйлсийн гарал үүслийг магадлан тодорхойлж, түүнийг бүрдүүлэгч нэхмэлийн ширхэгтийн физик, химийн шинж чанарын үзүүлэлтийг үндэслэн, музейн хадгалалтын зохистой орчныг бүрдүүлж, соёлын үнэт өв, үзмэрийн гэмтэл, гандалт, элэгдэл хорогдолгүй хадгалахад чиглэгдсэн судалгааны ажил хийгдсэнээрээ шинэлэг, шинжлэх ухааны ач холбогдолтой судалгааны бүтээл болсон.&nbsp;</p>
