Монгол улсад орчин үеийн шинжлэх ухааны байгууллага үүсэж >хөгжсөний 100 жилийн ой, Шинжлэх ухааны академи байгууллагдсаны 60 жилийн ойд зориулав.
Сонгодог улс төрийн эдийн засгийн ухааныг үндэслэгч, Шотландын эдийн засагч Адам Смитийн “Улс үндэстний баялгийн мөн чанар, учир шалтгааныг шинжлэхүй” хэмээх алдарт бүтээл хэвлэгдсэний 245 жилийн ой энэ жил тохиож байна. Нийгмийн эдийн засаг, улс төрийн системийг иж бүрэн судалсан 5 боть уг бүтээлийг дахин нарийн шинжилж, гол агуулга утга санааг нь шүүрдэн тунгааж, тэдгээр нь өнөөгийн Монголын нийгмийн харилцаанд хэрхэн бууж, хэрэгжиж байгааг харуулах зорилгоор бичив.
Шинжлэх ухааны академийн Философийн хүрээлэнгийн Философийн салбарын Улс төрийн эдийн засгийн ухааны тасаг 2018 онд байгуулагдсанаасаа хойш сонгодог болон шинэ улс төрийн эдийн засгийн ухааны онол, үзэл баримтлалыг судалж, Монголын эдийн засаг, улс төр, нийгмийн салбарын хөгжилтэй холбон тайлбарлах, түүний цаашдын хандлагыг тодорхойлоход ашиглах ажлыг хийж байна.
Энэ удаа “Адам Смитийн онол ба эдийн засгийн философи” хэмээх ном нь хоёр хэсэгтэй ба нэгдүгээр хэсэгт Адам Смитийн Үндэстэн улсуудын баялгийн мөн чанар, учир шалтгааныг шинжлэхүй хэмээх бүтээлийн гол агуулгыг тодорхойлон бичив.
А.Смит бүтээлийнхээ I ботид хөдөлмөрийн хуваарь болон түүнийг нөхцөлдүүлэгч учир шалтгааны тухай судалж, мөнгөний үүсэл, хэрэглээ, барааны жинхэнэ ба нэрлэсэн үнэ, ердийн ба зах зээлийн үнэ, цалин, капиталын ашиг, газрын рентийн мөн чанар, хэлбэрийг тодорхойлжээ.