“Мин Улсын үеийн Зүүн монголчуудын түүх” хэмээх энэ бүтээл 1800 оны сүүлээр хэвлэгдсэн. Монголын Юань их гүрний дараагаар 300 жил оршин тогтносон Мин гүрний үеийн Монгол, Хятадын харилцаа, Монголын бага хаадын тэмцэл зэрэг 650 гаруй жилийн өмнөх үеийн түүхийг өгүүлсэн ховор судлагдахуун байна.Монгол угсаатны 650 гаруй жилийн тэртээх түүх, газар орны байдал, дайн энхийн нөхцөлийг ийнхүү дэлгэрэнгүй өгүүлснээрээ түүхчид төдийгүй угсаатны зүй, гадаад харилцаа, эртний судлал зэрэг эрдмийн өргөн хүрээнд судалгааны хэрэглэгдэхүүн болох чухал бүтээл байна. Өргөн олон уншигчид зөвхөн сонирхолтой түүх уншаад зогсохгүй, өөрийн удам судраа олж тогтооход ч хэрэгтэй байж болох олон баримтууд энэ номонд багтжээ.ГХЯ-нд насаараа ажилласан, Ахмад дипломатч Б.Баасансүрэн, Г.Луузан элчин сайд нар Монголын түүхийнхээ энэ ховордсон баримтуудыг олон түмэнтэйгээ хуваалцах гэж энэ номыг орчуулжээ. Зарим эргэлзээ сэжгийг арилгахын тулд хятад эх сурвалжуудтай нь тулган нягталж, ханзаар нь нөхөж өгсөн нь орчуулгын шинжлэх ухааны ач холбогдлыг улам өргөн нэмэгдүүлсэн байна.Монгол улсын гадаад харилцааны 300 жилийн нэн сонирхолтой түүхийг өгүүлсэн ийм ном хэвлэгдэж байгаад Монгол Улсын Гадаад харилцааны сайд Б.Батцэцэг ихэд олзуурхаж талархалтай байгаагаа энд дурджээ.