Хэлний бодлого төлөвлөлтийг шинжлэх ухаан, судалгааны хамгийн сүүлийн үеийн ололт, амжилтад суурилж, оновчтой зөв боловсруулж хэрэгжүүлснээр бид зөвхөн эх хэлээ хөгжүүлж хамгаалаад зогсохгүй, дэлхийн бусад улс оронтой өөрийн ард түмний бүтээсэн түүх, соёлын баялаг уламжлалаас хуваалцан, мөр зэрэгцэн урагш алхах боломж нөхцөл бүрдэнэ.
Хэдийгээр хэдэн гадаад хэл сурах, ямар гадаад хэл сурах нь хувь хүний эрх чөлөөний асуудал боловч үндэсний аюулгүй байдал, эх хэл соёлын дархлааг хангах үүднээс гадаад харилцааны үзэл баримтлал, улс орны хөгжлийн бодлоготой уялдуулж, боловсролын салбарт эх хэл болон гадаад хэлний сургалт, хэрэглээний статусыг зөв зохистой хэмжээнд тогтоох, олон хэлтэй холбоотой харилцааг хууль эрх зүйгээр дамжуулан илүү сайн зохицуулах шаардлага бий болжээ. Тиймээс энэхүү бүтээлдээ эрдэмтэн Каплан болон Балдауф нарын хэлний бодлого төлөвлөлтийн зорилго, хамрах хүрээ бүхий онолд тулгуурлан гадаад хэлний сургалтын хөтөлбөрийн бодлого, сурах бичиг – аргазүйн бодлого, багшлах боловсон хүчний чадавх, үнэлгээний бодлогын хүрээнд Монгол улсын боловсролын салбар дахь гадаад хэлний (англи хэл) бодлого, түүний хэрэгжилтийг шинжлэн судалж өнөөгийн төлөв байдалд үнэлэлт дүгнэлт өгөх, энэ хүрээнд тулгамдсан асуудлыг илрүүлэх, тэдгээрийг шийдэх арга зам, гарц гаргалгааг тодорхойлохыг зорив. Монгол улс дахь англи хэлний боловсролын өнөөгийн нөхцөл байдлын судалгааны үр дүн, дэвшүүлсэн санал нь англи хэлний боловсролын үйлчилгээ явуулдаг байгууллага, багш, боловсрол судлаач, арга зүйч болон энэхүү үйлчилгээг хүртэж буй суралцагчид, англи хэлний бодлого боловсруулах, түүнийг хэрэгжүүлэх үүрэг хүлээсэн мэргэжилтнүүд болон хэлтэй холбоотой асуудлыг сонирхогч бусад хүмүүст онол, арга зүйн дэмжлэг болох ач холбогдолтой юм.