Энэхүү сурах бичгийг зохиогч ЗСБНХУ-ын ардын жүжигчин, профессор Б.Е.Захава бол Е.Б.Вахтанговын шавь, хамтран зүтгэгч, Вахтанговын нэрээр овоглодог театрыг үндэслэн байгуулагчдын нэг, жүжигчин, найруулагчаас гадна жүжигчин бэлтгэх сургуулийг хэдэн арван жилийн тасралтгүй удирдаж, шинэ залуу үеийг сурган хүмүүжүүлэх ажилд үр бүтээл гаргаж яваа хүн. Уран бүтээлийн хийгээд сурган хүмүүжүүлэх ажлын арга барил Евг.Вахтанговын нэрэмжит театр, Б.В.Щукиний нэрэмжит сурган хүмүүжүүлэх хамт олны ажлын арга туршлагыг нэгтгэн дүгнэх замаар энэ бүтээлээ туурвижээ. Бас тэрээр манай орны хийгээд гадаадын дэвшилтэт олон театрын хамт олны ажлын удирдамж хэдийнэ болоод байгаа Станиславскийн агуу их онолын үндэслэлээс эх сууриа авсан вахтанговчуудын тайзны урлалын ололт амжилтыг нэгтгэн дүгнэхийг зорьсон байна. Энэ бүтээл танин мэдэхүйн хувьд төдийгүй судалгааны ажлын хувьд жүжигчин, найруулагч, театрын уран бүтээлчид бэлтгэх үйл хэрэгт зүтгэж байгаа сурган хүмүүжүүлэгчид, театр судлаач, театр, урлагийн байгууллагын удирдах ажилтан, урлагийн салбарын ажилтан бүрт гарын авлага болохоор болжээ.