Бид 21-р зуун, нөгөөтээгүүр хил хязгаарыг даван биестэйгээ шууд харилцах бүрэн боломжтой эрин үед амьдарч байна. Хүн төрөлхтөн хэдэн мянган жилийн туршид цаг хугацаа, орон зайг алгасан биестэйгээ харилцахыг хүсэж байсан тэрхүү хүсэл өнөөдөр техник технологийн дэвшлийн ачаар бидний дунд бодит болоод зогсохгүй хэн нэгэнтэй холбогдох нь хялбар, дөт болжээ. Тэгвэл энэ үеийг зөв зохистой ашиглаж, амжилт гаргахыг хүсвэл гадаад хэл зайлшгүй сурах шаардлага үүсэж байна. Зохиогч миний бие олон жилийн турш эх хэлээс минь ялгаагүй болсон солонгос хэлийг “зовлон”-тойгоор сурсан бөгөөд цаашид бидний хойч үе над шиг битгий зовоосой гэж хүссэндээ солонгос, япон, хятад, англи хэлний сургалтын системийг цогцоор нь боловсруулан гаргав. Гадаад хэл сурахыг хүсэгч хэн бүхэнд зориулсан сургалтын цогц системийг боловсруулж, сурах боломжоор хангавч яагаад сурах ёстой, хэрхэн үг цээжлэх, цаашдын хөгжил хийгээд чиг хандлага, арга зүйг нарийн тайлбарлаж өгөх үүрэг, хэрэгцээ бидний өмнө урган гарч ирэв. Гадаад хэл сурахын гол үндэс бол “шинэ үг цээжлэх” бөгөөд үүний мөн чанарыг ойлгохгүйгээр сурч буй үгээ амандаа бувтнан, дэмий хоосон цагийг өнгөрүүлэх нь эдийн засгийн асар их хохиролтой тул өөрийн чадлаар тайлбарлахыг зорьж энэхүү номыг боловсруулан та бүхний өмнө өргөн барьж байна. Шинэ үг цээжлэхийн уг үндсийг нь судалж, хаанаас хэрхэн эхлэх хийгээд хэр хэмжээнд үр дүн гарч болох үйл явцыг системтэй зөв ойлгож чадвал гадаад хэл сурах нь хэн бүхний хувьд баяр баясалтай зүйл юм гэдгийг ойлгуулахыг зорьсон хичээл зүтгэл маань утга учиртай болох юм.