Ном бол хүмүүн төрөлхтөний бодож олсон үнэхээрийн гайхамшигтай зүйл. Миний бие үсэг холбож үг бүтээж, уншиж сурсан цагаасаа эхлээд номтой нөхөрлөсөн хүн. Аав ээж минь цалингаа аваад надад нэг, нэг төгрөг өгдөг байлаа. Би түүнийг нь чихэр жимсэнд зарахаасаа илүүтэй хурааж байгаад ном авч уншдаг, ном цуглуулдаг хүүхэд байв. Тэр үед ном ч хямдхан, хүүхдийн ном 40, 50 мөнгө, 1 төгрөг. Ер нь ном голдуу 5-10 төгрөгийн хооронд байсан. Тэхдээ л хайрцаг чүдэнз 10 мөнгө, 10 төгрөгөөр 10 кг гурил авдаг байсан гээд бодохоор бас ч тийм хямд байгаагүй юм болуу даа. Үнэтэй номууд ч байсан. Авъя гэсэн номоо үнэ харалгүй л авна. 104 1 , 150 2 төгрөгөөр ном авч л байлаа. Одоогоор 150 000 төгрөг гэмээр ч юм уу. Ном унших үнэхээр сайхан. Үлгэрийн сайхан ертөнцөд ороод явчихна. Гэгээн сайхан мөрөөдөлд умбана. Бүхэл бүтэн улс орон, айл гэрийн амьдрал руу орно. Хүний сэтгэлийн гүн рүү орно. Тэр хүний бие, сэтгэлд орж зовж жаргаж, уйлж дуулна. Ном ярьдаг юм. Хашгирч зандарч, зэмлэж ярина. Зөөлөн шивнэж, учирлаж ухааруулж ярина.

Ном хэмээх хүлэг моринд мордсоноор хоромхон зуурын хугацаанд даян дэлхийг тойрч энэхэн дэлхий хэмээх цэнхэрхэн гараг нь тийм ч том бишийг ойлгож, хүн төрөлхтөний туулсан амьдрал, улс түмнүүдийн нийтлэг болоод онцлог жаргал зовлон, хүсэл тэмүүллийг мэдэрнэ.

Номын ачаар танин мэдэхүйн их далайд сэлүүрдэж байгаль, нийгэм, хүний тухай зөв ойлголттой болж, ертөнц, дэлхий, амьтан, ургамал, хүмүүний үүсэл гаралыг мэдэж, хамгийн ойрын энэхэн галагтик нь 3-хан минутад үүсэн бүрэлдсэнийг мэдэж гайхширна.

Энэ бол өчүүхэн миний зах зухын ойлголт. Тэгвэл номын тухай дэлхий дахины, дорно дахины, миний монгол өвөг дээдэс, эрдэмтэн мэргэд, номд хайртай хүмүүсийн хэлсэн, айлдсан эшлэл үгүүд хэдэн зуугаараа байх юм. Тэр бүхнээс дээжлэн төрөлх монгол хэлнээ чадан ядан хөрвүүлж, мөн түүвэрлэн цуглуулж энэхүү жижигхэн номоо бүтээлээ.

Жижигхэн ч гэсэн жишишгүй үнэ цэнэтэй НОМ-ын тухай эшлэлээр бүтсэн энэхүү ном маань номд хайртай, номыг эрхэмлэн дээдэлдэг мэргэн уншигч түмэн олон Та нарт минь, та нарын гэр бүл, үр хүүхдүүд, ач зээ нарт чинь үнэтэй хөрөнгө оруулалт болно буйзаа гэсэн чин сайхан сэтгэл, итгэлээр “Номын тухай ном”-оо Та бүхэндээ өргөн барьж байна.