"Эрчүүдийн үнэн түүх" дэлхийн шилмэл өгүүллэгийн түүвэрт уран зохиолын ертөнцөд хүлээн зөвшөөрөгдсөн, хамгийн нөлөө бүхий эрхмүүдийн шилдэгт нэрлэгдэх өгүүллэгүүд багтсан болно.
Трүмен Капотегийн "Миний ярих ээлж", Альберто Моравиагийн "Битгий их бод" өгүүллэгүүд хөнгөн егөөтэй. Магад ийм эрчүүд бидний дундаас, энэ нийгмээс хэдэн зуугаараа төрөн гарсаар байгаа юм бил үү гэж эрхгүй бодогдохоор бүтээлүүд юм. Эрнест Хемингуэйн бичлэгийн давтагдашгүй хэв маягийн оргилд тооцогддог Фрэнсис Макомберын зуурдын жаргал, Харүки Муракамигийн өвөрмөц арга барилыг товчхон агаад тод томруун харуулах "Тони Такитани" зэрэг өгүүллэг нь амжилт, манлайллын нийгэм дэх ялагчдын дотоод дахь энгүүн оршихуй, сэтгэлзүйн зөрчлийг хөндөж, гашуун ёжлолоор гарган тавьжээ. Мөн та эл түүврээс Хэнри Миллерийн задгай авьяас, Владимир Набоковын идэр залуу насны яруу мэдрэмжийг амтлах болов уу гэж найдна.
Зохиолч Казүо Ишигүрогийн "Өдрөөс үлдсэн зүйл", "Хөвөлзөх ертөнцийн зураач", Харпер Лийгийн "Гургалдайг хөнөөхүй", Орхан Памукийн "Шинэ амьдрал", "Цагаан цайз", Сабахаттин Алигийн "Бидний доторх чөтгөр", "Арьсан хүрэмтэй Мадонна" зэрэг олон арван орчуулгын бүтээлээрээ уншигчдын хэзээний танил болсон орчуулагч Г.Сугиррагчаа Америк, Итали, Турк, Израил, Орос, Япон зэрэг орны хүүрнэл зохиолын сод төлөөлөгчдийн өгүүллэгээс сонгохдоо хүн хоорондын харилцаа, хүйсээр зааглагдах боломжгүй жам ёсны нандин мэдрэмжүүдийг олж нээх боломжийг чухалчилсан байна.
Монгол хэлнээ урд өмнө нь орчуулагдаж байгаагүй эдгээр арван дөрвөн өгүүллэгийн өгүүлэмжийн гүнд таарах баатруудын ертөнц уншигч таны дотоод ертөнцтэй олон талаар шүргэж, танд онцгой сэтгэгдэл төрүүлж, мэдрэмжийг тань хөглөж чадвал бидний цаг зарж, цаас цоохорлосны хэрэг бүтэх билээ.
Уг түүвэрт Жон Чивер “Гэрлэлтийг анагаах нь”, Трүмен Капоти “Миний ярих ээлж”, Альберто Моравиа “Битгий их бод”, Хенри Миллер “Мадемуазель Клод”, Чазере Павезе “Амиа хорлогсод”, Эрнест Хемингуэй “Фрэнсис Макомберын зуурдын жаргал”, Бернард Маламуд “Мэргэжил сонголт”, Владимир Набоков “Анир чимээ” Раймонд Карвер “Цогчин дуган”, Чарльз Буковски “Буцаж ирсэн нь”, Пол Боулз “Лачен, Идир хоёрын түүх”, Юсуф Атылган “Намхан баганаас цааш”, Амос Оз “Гол мөрөн бүхэн”, Харүки Мүраками “Тони Такитани” өгүүллэгүүд багтжээ.