Харцага Самбуугийн Товуудорж Өвөрхангай аймгийн Баруунбаян-Улаан сумын Баруун Шийр уулын их өвөлжөөнд үе залгамжилсан малчин айлд хөхөгчин тахиа жилийн хаврын тэргүүн Бар сарын 12-нд төржээ. Тэрбээр Баруунбаян-Улаан, Гучин-Ус, Арвайхээрт бага, дунд сургууль төгсөж, улмаар цэргийн алба хаасан. С.Товуудорж МУИС-ийн орос хэл, утга зохиолын анги, НДС-д суралцан төгссөн. Тэрбээр ЕБС-д багш, захирал, Эрдэнэт хот, Завхан аймгийн намын хорооны хэлтсийн эрхлэгчийн алба хашиж, 1991 оноос 'Ардын эрх', МОНЦАМЭ-гийн Завхан аймаг дахь сурвалжлагч, 1997-2005 онд 'Үнэн' сонинд ажиллаж байжээ. Зохиолч С.Товуудорж 'Онгосон дээлт' '1997он', 'Уранхай дээлт' '2002 он', 'Намхан бор толгод' '2012' өгүүлэгийн, 'Нар мандсаны дараа' '2004 он', 'Аараг гүвээн гүнд' '2014 он' шүлгийн, 'Сарны дорхи уянга' '2004 он' өгүүлэг, туужийн ном, 'Сүүн цацлагатай уул' '2003 он', 'Хааны элч' '2009 он', 'Тэнгэр газрын өршөөл' '2011 он', 'Хааны удмынхан' '2012 он', 'Эзэгнэгчийн эцэслэл' '2014 он' роман, Монголын түүхийн талаар 'Зүчи хаан' '1999 он', 'Цагадай хаан' '2000 он', 'Хайду хаан' '2001 он', 'Барсболд сайн алаг хаан' '2005 он', 'Шадбал хаан' '2012 он', 'Монголд олзлогдсон япон эмч''2007 он' зэрэг 20 гаруй ном хэвлүүлсэн байна. 'Монголд олзлогдсон япон эмч' ном нь 'Монголд ирсэн самуурай' '2008 он' нэртэйгээр япон хэл дээр хэвлэгдсэн. С.Товуудорж Монголын чөлөөт зохиолчдын холбооны нэрэмжит '2003 онд' болон шилдэг бүтээлийн '2014онд' шагналт зохиолч бөгөөд чөлөөт уран бүтээлч хүн юм.