Тус номонд Д.Рикардо болон А.Смитийн онолын баримтлалыг үндэслэн орчин үеийн эдийн засгийн гол асуудлуудыг судалж, дэлхий дахины болон түүний дотор Монгол Улсын эдийн засгийн хөгжлийн явц, зөрчил, цаашдын хандлагыг тодорхойлов. “Хуучин ба шинэ эдийн засаг (Д.Рикардогоос өнөөг хүртэл)” хэмээх тус ном 5 бүлэгтэй, I бүлэг “Шинэ ба хуучин эдийн засаг”, II бүлэг “Эдийн засгийн өсөлт”, III бүлэг “Санхүүгийн тогтолцоо”, IV бүлэг “Гадаад худалдаа”, V бүлэг “Эдийн засгийн тэгш бус байдал” гэсэн нэртэй.
Эдгээр асуудлыг эрдэмтэн судлаачид, эдийн засагчид урьд өмнө хангалттай судалсан. Гэвч өнөө үед дэлхийн улс төр, эдийн засаг, нийгмийн харилцаа эрс өөрчлөгдөх төлөвтэй болов. Энэ нь аж үйлдвэрийн IV хувьсгалын дүнд шинэ эдийн засаг үүсэж, хуучинтайгаа зөрчилдөх болсонтой юуны өмнө холбоотой. Түүнчлэн Орос, Украины дайн эхэлж, дэлхийд хүчний харьцааг өөрчлөх, олон туйлт шинэ дэг журам тогтоохын төлөө ширүүхэн тэмцэл өрнөв.
Энэ сөргөлдөөн даяаршлын үйл явцыг саатуулж, даяаршсан, хамтран ажилласан дэлхийг хуваагдмал, зөрчилдөн тэмцсэн дэлхий болгон өөрчилж байна. Ийм нөхцөлд дэлхийн болон улс орнуудын эдийн засгийн харилцаа хэрхэн өөрчлөгдөх, цаашид юу болохыг судлах бодит шаардлага үүслээ. Энэ судалгааг шинэ улс төрийн эдийн засгийн ухаан хийнэ. Учир нь шинэ улс төрийн эдийн засгийн ухаан нь дэлхий нийтийн болон бүс нутаг, улс орнуудын хөгжлийг улс төр, эдийн засаг, нийгчийн талаас нь иж бүрэн судлах бололцоотой юм.