Байх, Биш, Бий гэсэн ухагдахуунуудыг философийн хэрэглээний үг болгож “зоослож, цутгасан”буюу Монгол хэл дээр философидох цар хүрээг тэлсэн С.Молор-Эрдэнэ цуврал бүтээлээ гурван философичийн бүтээлүүдээс чухалчилсан хэсгүүдээ өөрийн тайлбар, уншигчид тавих асуултуудын хамтаар шинэчлэн гаргалаа. Энэхүү цувралд XX зууны Өрнийн философийн гол бүтээлүүд болох Мартин Хайдэггерийн Байх ба Хугацаа (1927), Жон-Пол Сартрын Байх ба Биш (1943), Эрих Фроммын Бий эсвэл Байх (1976) багтана.

Хайдэггер өөрийн бүтээлдээ түүний үзсэнээр Платогоос хойш онтологи салбарыг орхигдуулсан алдааг засаж, Байхын асуултыг дахин тавих, ингэхдээ Байх гэж өөрөө юу болохыг лавлаж, түүний нөхцөлүүд болон логосын талаар философидож, амьдрал болон Байх өөрөө Хугацаатай хэрхэн уялддагийг гаргасан. Энэ бүтээл нь эксистэнциализмын философийг “төрүүлсэн” буюу олон орны философичид төрөн гарч, түүн дотроо Сартр Байх ба Биш бүтээлээ бичихэд нь нөлөөлжээ. Сартр өөрийн бүтээлдээ хүн байхын нөхцөлүүдийн талаар философидож, ямар үед бид Биш болдог талаарх ялгааг гаргасан. Нийгмийн психоаналитикч Эрих Фромм Бий эсвэл Байх бүтээлээрээ хүний амьдрал нийгмийн нөхцөл, тэр дундаа соёл болон хэлний нөхцөлүүдтэй хэрхэн уялдаж, материализм болон эксистэнциализмын дунд буй хүний өнөөгийн нөхцөл байдлын талаар философиджээ.

Эдгээр сор бүтээлүүдийг Монгол хэлнээ буулгаж, хэлний үгийн санг буюу ухагдахуунуудыг баяжуулж, ухагдахууны бүрэн бүтэн байдлыг хадгалсан агуулгаар бичсэн зэрэг нь бидэнд нэгээс илүүг бодогдуулж, хүн байхын олон асуултын хариуг эрэлхийлэх хэрэглүүр болох болно.