Уг номыг эрдэм шинжилгээний сэтгүүлийн өгүүлэл, докторын диссертаци, магистрын дипломын ажлын төсөл, саналыг боловсруулах гэж буй, эсвэл судалгааны санхүүжилтийн төлөвлөгөө гаргахад арга зүйн дэмжлэг шаардагдаж буй оюутан, судлаач, багш хэн бүгдэд зориулсан болно. Номыг илүү өргөн хүрээнд судалгааны аргын хичээл сургалтад зориулсан лавлах, сурах бичгийн аль ч утгаар хэрэглэж болно.

Энэхүү ном нь судалгааны санал, судалгааны төсөл боловсруулахын тулд судалгааны хүрээ, судалгааны үйл явц, судалгааны бүрдлийг хэрхэн тодорхойлох асуудлыг хөндсөн бөгөөд хүмүүнлэг, эрүүл мэнд, нийгмийн шинжлэх ухааны салбарт чанарын, тоон болон холимог аргын судалгаа эрхэлдэг хүмүүст зориулж чанарын, тоон, холимог гэх судалгааны гурван хандлагыг хооронд нь харьцуулан авч үзсэн. Чанарын судалгаа хүчээ авахын зэрэгцээ, холимог аргын судалгаанууд шинээр бий болж, тоон судалгааны бүтээл ч олширсон нь судалгааны эдгээр гурван хандлагыг харьцуулан авч үзэхэд хүргэсэн юм. Бид харьцуулалт хийхдээ судалгааны гурван хандлагад орших философийн үзлийн (philosophical assumptions) тайлбараас эхэлж, улмаар сэдвийн судлагдсан байдлын тоймыг хэрхэн боловсруулах, онол хийгээд концепцийн хүрээг хэрхэн ашиглах талаар хэлэлцэн, эрдэм шинжилгээний ажилд баримтлах ёс зүйн хэм хэмжээ болон “үзэг цаас нийлүүлэн бичих дадал хэвшил”-ийн ач холбогдол зэрэг асуудлыг хөндсөн болно.

Түүнчлэн уг номд судалгааны төсөл боловсруулж, хэрэгжүүлэх үйл явцын гол бүрдэл элементүүдийг авч үзсэн. Үүнд, судалгааны удиртгалыг бичих хэсэг; судалгааны асуулт, таамаглал тодорхойлох хэсэг; мэдээлэл цуглуулж, дүн шинжилгээ хийж, тайлбарлах процедурын хэсэг зэрэг бүрдлүүдийг багтаав. Судалгааг боловсруулах энэхүү үйл явцын алхам бүрд уншигч буюу судлаач чанарын, тоон, холимог аргын аль аль хандлагатай танилцах болно.