Монголын уран нугаралт дэлхийд танигдаж, олон нийтийн анхаарлыг ихээр татах болсон цагаас эхлэн олон улсын хэвлэл мэдээлэл Монголын уран нугарагчдаас тогтмол сонирхон асуудаг байсан асуулт нь: Яагаад нугардаг хүмүүс Монголд их төрдөг юм бэ?, Уран нугарагч хүн төрөлхийн уян байх ёстой байдаг уу?...., нэн ялангуяа Уран нугаралтын сургалтын үйл явц, заах аргын талаарх гарын авлага байдаг уу?” асуултуудыг үргэлж сонирхож асуудаг байв...

Номыг зохиогч МУГЖ Ж.Эрдэнэчимэг дэлхийд алдартай Канадын Нарны циркийн “О” шоунд 1998 оноос хойш тасралтгүй 18 жил дасгалжуулагч багшаар ажиллах хугацаанд олон улсын спортын дасгалжуулагч багш, спортын эмч нартай ажлын нэг баг болж хамтран ажиллаж байхдаа уран нугарагч жүжигчдийн дасгал сургуулилтын үйл явц, бэлтгэл болон тоглолтын өдөр цагийг зөв хуваарилах, ажлын ачааллыг зохицуулж нурууны өвдөлт, бэртэл гэмтлээс урьдчилан сэргийлэх зэргээр уран нугарагч жүжигчдийг үр бүтээлтэй, амьдарлынхаа он удаан жилийг уран нугаралтандаа зориулахад нь анхаарч ажилласан ба, хүний бие мах бодь-анатомийн анхан шатны мэдлэг нь уран нугаралтыг зааж зөвлөх багшийн ур чадварт зайлшгүй хэрэгтэйг ойлгож, мэдлэг ур чадвараа тогтмол дээшлүүлж ажиллажээ.

Тэрээр “О” шоунд ажиллахын хажуугаар олон үндэстний хүүхдүүдэд уран нугаралтыг 20 гаруй жил заахдаа Монгол хүүхдүүдийн бие мах бодийн уян хатан чанар, юмыг сурах тэсвэр тэвчээр болон суралцах хугацааны үйл явцын ялгааг бусад орны хүүхдүүдтэй харьцуулан судлаж байсан ба, энэхүү олон жилийн туршлага, судалгаа шинжилгээндээ үндэслэн "УЯН Уран нугаралтын заах арга зүй" номоо бүтээжээ.